akinik qaffaaneq

SIK: Pisissutaasinnaasut eqqorneqarput

– Uuliap benzinallu akiata qaffanneratigut isumaqatigiissupput nutaaq isumassaaruppoq, Jess G. Berthelsen oqarpoq

Jess G. Berthelsen
Jess G. Berthelsen: – Uuliap benzinallu akiisa qaffannerisigut nioqqutissat amerlanerpaat akii qaffassapput.

Tallimanngormat uuliap, benzinap petruuliullu akiisa qaffannerat SIK-p siulittaasuata Jess G. Berthelsenip akerlilerpaa, ilaasortamik aningaasarsiaata pisissutigineqarsinnaanerat eqqorneqarmat.
Akit qaffanneqarmata dieseli gasuulialu 54 øremik akitsorlutik 611 koruuniniit 6,65 koruuneqalerput, benzina 39 øremik akitsorluni 6,11 koruuniniit 6,50 koruuneqalerpoq, petruuliulu 55 øremik akitsorluni liiterimut 6,21 koruuniniit 6,76 koruuneqalerpoq. Akinut ilaapput avatangiisinut akitsuut 10 øre.
SIK-p siulittaasuata akit qaffanneqarnerat tupaallaatigeqaa.
– Solaarimik qaffaanerup kingunerisarpaa ilaasortatta aningaasarsiaasa pisissutigineqarsinnaaneranik annetoqisumik innarliisarnera, Jess G. Berthelsen tikkuaavoq.
– Siullermik SIK-miik paasiuminaatsipparput qaffaat sooq taamak annertugigissanersoq. Solari 8,84 procentimik qaffappoq, tamannalu annertoqaaq. Akinik qaffaanikkut isumaqatigiinniarnermi aningaasarsiat pisissutigisinnaasat angoqqammisagut aserorneqarluinnarput. Nalunngilarpummi ikummatissat akii qaffanneqaraangata allat tamarmik akii aamma qaffattartut, SIK-p siulittaasua oqarpoq, isumaqarporlu akit qaffaataannik akiliisussat ataasiinnaasut, tassalu atuisartut.
– Nunarsuarmi ikummatissat akii qiviarutsigit takusinnaavarput akit annikitsuinnarmik nikerartut. Qaffalaartarlutik appalaartarlutillu. Taamaattumik SIK-p paaserusuppaa akit taama annertutigisumik qaffanneqarnerannut suna pissutaanersoq, aammalu Naalakkersuisut akinik qaffaanissamut akuersisimanersut, SIK-p siulittaasua oqarpoq.
Aamma Atassutip apeqqutiginikuuvaa akinik qaffaaneq Naalakkersuisut akuerisimaneraat.
– Naalakkersuisummi akinik qaffaanissaq akuerisimagunikku, pisisinnaaneq attatiinnarniarlugu, allatigut akinik appaasariaqarput, isumaqatigiissut SIK-mut ilaasortanut isumaqassappat. Akit qaffannerisigut misigisimavugut isumaqanngitsumik isumaqatigiissuteqarsimalluta.

Powered by Labrador CMS