SIK: Peqqinnisaqarfimmik atuinermut akiliuteqartitsisoqartassanngilaq
Peqqinnissaqarfimmik atuinermut akiliuteqartitsisoqartassappat innuttaasut pissakinnerusut peqqiilliorneruliinnarsinnaapput - tamatumalu malitsigisaanik piffissaq ungasinnerusoq eqqarsaatigalugu inuiaqatigiinnut akisuneruliinnarsinnaalluni
- Peqqinnissami atuisut akiliuteqartarnissaat atulinngikkili.
Taamatut oqarpoq SIK-mi siulittaasoq Jess. G. Berthelsen, Demokraatini siulittaasuugallartoq Nivi Olsen, Inatsisartut ataasinngormat ammaanersiorlutik oqallinneranni peqqinnissaqarfimmik atuinerit ilaannut akiliuteqartitsisalernissamik siunnersuuteqareersoq.
- Assersuutigalugu Danmarkimi nakorsaatinut kigutinillu isumaginninnermut atuisutut tamakkiinngikkaluartumik akiliuteqartoqartarpoq, Nivi Olsen oqaaseqarnermini erseqqissaavoq.
Meeqqat eqqugaassapput
Aaqqissuussineq tamanna peqqinnissami naligiissitsisoqarnissaanik qulakkeerinnittuummat atorunnaarsissallugu pissutissaqanngilagut, Jess G. Berthelsen oqarpoq.
- Sulissutigisassarli tassaavoq aaqqissuussinerup ineriartortinneqarnissaa pitsanngorsarneqartuarnissaalu, Jess G. Berthelsen erseqqissaavoq.
Atuisartut akiliuteqartarnissaat aningaasartuutinik aqutseriaatsitut atorneqalissappat imaaliallaannaq annertusineqaqattaalersinnaavoq – pilliutigineqartussallu taakkuussapput inuiaqatigiinni aningaasatigut pissakinnerusut taakkualu meeraat.
- Ilanngullugu taasariaqassaaq taamatut pisoqassappat kalaallit naalagaaffeqatigiinnerup ilaanut aningaasarissaarfiunerusumut nuukkusutsattut atamanna amerlisut, tusagassiorfinnut nalunaaruteqarnermini oqarpoq.
Peqqinnissaq pillugu Ataatsimiititaliarsuaq
Peqqinnissaq pillugu ataatsimiititaliarsuarmik pilersitsisoqarnissaa Demokraatit kissaatigigaat tusarparput. Ataatsimiititaliarsuullu isummerfigisassaasa ilagissavaanngooq atuisut ilaatigut akiliuteqartalersinnaanersut – soorlu nakorsaatinut kigutileritinnermullu tunngatillugu”. Tamanna inuussutissarsiuteqartut kattuffiata isumaqatigaa.
- Kisianni peqqinnissami akeqanngitsumik sullinneqarsinnaaneq innarlerneqassanngilaq. Atuisut akiliuteqartalernissaat pissakitsunut peqqiilliuutaaginnalissaaq – taamaalippallu siunissaq ungasinnerusoq eqqarsaatigalugu peqqinnissaqarfik akisunerulissajunnarsivoq-aasiit, Jess G. Berthelsen oqarpoq.