SIK: Mittarfiit kittaarlugit sananeqarlik
Nuummi, Ilulissani Qaqortumilu mittarfiliornissat kittaarlugit sananeqarnissaat SIK-mit, IA assigalugu, isumaqarfigineqarpoq
- Sulisussaqarniarneq eqqarsaatigalugu, aammalu sapinngisamik sulisartut nunaqavissut annertunerpaamik peqataatinneqassappata, kikkunnut tamanut pitsaanerpaajussaaq mittarfeqarnermi suliassat kittaarlugit ingerlanneqarpata.
SIK-mi siulittaasoq Jess G. Berthelsen tusagassiutinut nalunaarummi allappoq.
Suliap akikinnerunissaa
Inuit Ataqatigiinnit siunnersuutigineqartoq assigalugu mittarfiliortiternerit kittaarlugit sananeqarnissaannik isuma SIK-mit taamaasilluni isumaqatigineqarpoq.
- Kialluunnimmi takorloorsinnaavaa ataatsikkoorsuaq sananeqassappata avataaniit sulisus-sanik annertoorujussuarmik tikisitsisariaqassasugut. Taannaannaanngilarli – tamatuma akinut pitsaanngitsumik annertuumik sunniuteqarnissaa naatsorsuutigineqartariaqarpoq sanaartorneq nalinginnaasoq aamma sumiiffinni ingerlanneqassappat. SIK allaat isuma-qarpoq mittarfiit kittaarlugit sananeqarunik akikinnerusumik sananeqarsinnaasut, SIK-mi siulittaasoq oqarpoq.
Kim Kielsen nersualaarpaa
Aammali Naalakkersuisut siulittaasuat Kim Kielsen nersualaarneqarpoq:
- Naalakkersuisut siulittaasuata aningaasanik taama amerlatigisunik suliniutinut pissarsinera SIK-p nersorneqartariaqartutut isigaa. Ameerikkarmiut aningaasaleeqataaniarlutik neqeroorutaat aamma akorluartariaqarpoq iluatigalugulu, tamanna immaqa aamma Kangerlussuup mittarfittut ataannarnissaanut iluaqutaasinnaammat, Jess G. Berthelsen oqarpoq.