Sikkilertut, pisuinnaat biilinilu ingerlaqatigiinneq pingaarnerutinneqartariaqarput
Ukiut tamarluinnaasa aqqusinerni biilinik arlaqarnerusunik takkuttoqartarpoq, tamannalu ingerlaannarpat kinguleriiaarpassuarni inissisimaleratarsinnaavugut. Avatangiisinik illersuiniaqatigiiffik kommunip sikkilinut aqqusinernik isumannaatsunik biilernermilu ingerlaqatigiinnermik salliutitsinissaanik kaammattuivoq.
Kommuneqarfik Sermersooq aqqusinikkut angallannermi immikkoortumut pilersaarusiamik suliaqaleruttorpoq. Tamatumani Nuummi aqquserngit kiisalu sikkilertut pisuinnaallu suliarineqarput. Immikkoortumut pilersaarusiap 2021-p aallartinnerani tusarniaassutigineqarnissaa naatsorsuutigineqartoq, pilersaarusiornermut pisortaagallartoq Runa Sværd oqarpoq.
Kommuni immikkoortumut pilersaarusiap suliarineqarneranut atatillugu Nuummi aqqusinerni angallattunik kisitsisimavoq. Pingaartumik aqquserngit tallimat angallaffiusorujussuupput. Taakkua tassaapput Eqalugalinnguit, ullup unnuallu ataatsip ingerlanerani biilit 16.000-it ingerlaarfigisartagaat, Sipisaq Kangilleq ullup unnuallu ataatsip ingerlanerani biilit 14.800-it ingerlaarfigisartagaat, Peter Thårup Høegh Aqqutaa ullup unnuallu ataatsip ingerlanerani biilit 11.200-t ingerlaarfigisartagaat kiisalu 400-talik, ullup unnuallu ataatsip ingerlanerani biilit 7.800-t ingerlaarfigisartagaat.
– Aqqusinerni angallattunik kisitsisimavugut, tamatumanilu tikkuarneqarpoq, aqquserngit tatineqarnerat rush-hoursinut taarsiullugu rush-minutsit atorlugit oqaasertalerneqarsinnaasoq. Tamatumanngali nuanniilliorneq minnerulersinneqanngilaq, imaluunniit iliuuseqannginnissamut utoqqatsissutaanani, Runa Sværd oqarpoq.
Unammilligassaq tassaavoq, biilit ukiut tamarluinnaasa amerliartornerat. Ukiut nikinneranni Kalaallit Nunaanni inuinnaat biilii 5.375-it nalunaarsorneqarsimapput, ukiup siulianut 356-inik amerlanerusut, Naatsorsueqqissaartarfimmit kisitsisinit takutinneqarpoq. 2020-lu allaanerussagunanngilaq. Biilinik nioqquteqartartut tamarluinnangajammik ukioq manna biilinik tunisat amerliartornerannik nalunaarsimapput, tamannalu nunanut allanut angalanissaagaluit taamaatiinnarneqarsimanerannik pissuteqarunarpoq, taamalu nuannaarniutinut allanut soorlu biilinut nutaanut aningaasassaqartoqalersimalluni.
Sikkilertunut aqquserngit pitsaanerusut
Kisianni ullaakkut biilit siuleriiaarpassuusarnerat atuutilissanngippat, innuttaasut ilaat bussernissamut, sikkilernissamut biiliniluunniit ingerlaqatigiittarnissamut isumassarsisinneqartariaqarput. Taama Kåre Press-Kristensen, Rådet for Grøn Omstillingimi siunnersortaanerusoq, isumaqarpoq.
– Isumaqarpunga aqquserngit artukkerneqarsimanerat iliuuseqarfigineqarsinnaasoq sikkilinik angallannerup annertunerujussuarmik siunniunneratigut – pingaartumik aasaanerani. Københavnimimi misilittakkanit takutinneqarpoq, -15 gradinik issitsigisoq tikillugu sikkilertoqarsinnaasoq, sikkilertut aqqutaat aputaajarneqarsimatillugit sermeqartinnagillu. Tamanna tattorliuunnermik, silaannarmik nipimillu mingutsitsinermik, biilit unittarfiinik pisariaqartunik, biilinik tikisitsisarnermik allanillu annikillisitsissaaq. Tamatumalu peqatigisaanik timersornermut attuumassutilimmik peqqissutsikkut iluaqutissamik angusaqartoqassalluni. Sikkilit innaallagiatortut akii appariarujussuarsimapput, qummukajaakkoornermilu iluaqutaasinnaallutik, Rådet for Grøn Omstillingimi siunnersortaaneq, Kåre Press-Kristensen, oqarpoq, kommunilu kaammattorlugu ineriartorneq tamanna sunniivigeqqullugu aqquserngit tulluarsarlugit, sikkilertunut isumannaatsunngorlugit tamatumalu saniatigut tamakkua aputaajartarlugit sermiiartarlugillu.
Aviisimut tapiliussami Motoorimi atuarnerusinnaavutit. Uani pissarsiariuk - akeqanngilaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...