SIK-mit Royal Greenlandip namminersortunngortinniarneqarnera mianersoqqutigineqarpoq
Politikkerit Royal Greenland inuiaqatigiit pigisaat erligisariaqarpaat, aalisakkerinermimi ingerlatseqatigiiffik sineriammi suliffeqartitsillunilu aningaasaqartitsivoq, kattuffimmit oqaatigineqarpoq.
Naalakkersuisooqatigiinni partiit Naalakkersuisullu piareersimapput, nunap immikkoortortaanni mittarfiliornissamut allatullu attaveqaateqarnissamut akissaqarniarlutik Royal Greenlandip 33 procentia angullugu tunisaqarnissamut.
Pilersaarut illuatungiliuttut partiivinit arlalinnit isornartorsiorneqarsimavoq, maanna sulisartut kattuffiat SIK isornartorsiuisunut ilanngulluni.
SIK-mit uggorineqarlunilu isonartoqartinneqarpoq ilaannakuusumik namminersortunngorsaanissamut pilersaaruteqarneq, kattuffimmi siulittaasoq Jess G. Berthelsen oqarpoq:
- SIK isumaqarpoq Royal Greenland inuiaqatigiit pigisarput erligisariaqaripput – taannami maannakkut kisiartaangajalluni sinerissami illoqarfinnik nunaqarfinnillu atatitsisuuvoq, Jess G. Berthelsen tusagassiorfinnut nalunaaruteqarluni allappoq.
Sineriammut kinguneqaataasinnaasut ernummatigigai
Taassuma Sermitsiaq.AG-mut itisiliilluni oqaatigaa, aningaasaliisartut namminersortut Royal Greenlandimi sunniuteqarpallaalerpata sineriammut tamatuma kingunerluuteqarsinnaanera ernummatigalugu:
- Annilaanngatigaara namminersortunngorsaanerulersitsisoqartilugu namminersortut sumi aalisakkeriveqarnissamik aalajangiinerusalersinnaanerat. Tamatumami malitsigisaanik Kalaallit Nunaanni ullumimut sanilliullugu equngasoqarnerulissaaq, Jess G. Berthelsen oqarpoq.
Royal Greenlandimi innuttaasut illoqarfinnut nuuttarnerannik unitsitsisinnaasoraajuk?
- Tassa tamanna neriuutigisara. Assersuutigalugumi Ilulissat avannaata tungaani aalisarfiulluartumi qanoq iliussagatta. Inuit sumi sulisassappat, Jess G. Berthelsen aperivoq.
Mittarfissualiortitsinerit aallartitsinnagit eqqarsaatigineqarsimassagaluartoq
Sulisartut kattuffianni siulittaasup taamaammat nunap immikkoortuini mittarfliornissaq akissaqartinniarlugu Royal Greenlandip ilaanik tunisaqartoqarnissaanik isumassarsialatsiaanermik tunngavilersuineq isumaqatiginngilaa.
Nuummi Ilulissanilu mittarfissualiortitsilertinnani eqqarsaatigineqarsimassagaluarpoq aningaasat atugassat suminngaanniit aaneqassanersut, Jess G. Berthelsen isumaqarpoq.
Sulisartut kattuffianni siulittaasup upperinngilaa, mittarfissarsuit marluk pineqartut imminnut akilersinnaanissaat, taamaammallu aningaasat nunami mittarfinnut atorneqartariaqaraluartut isumaqarluni.