SIK-p nutaamik partiiliortoqassanersoq oqaluuserissavaa: Jess G.-p politikkerinngulernerluni oqaatigerusunngilaa
Sulisartut kattuffiani SIK-mi siulittaasup Jess G. Berthelsenip oqaaseqarnermini kattuffiup sulisartut partiiannik pilersitsisinnaanera oqaatigisimavaa. - Siulersuisuunerit qaammatip matuma naalernerani ataatsimiinnerminni tamanna oqaluuserissavaat, siulittaasoq nammineq oqaaserisimasaminut oqaaseqarusunngitsoq oqarpoq.
Jess G. Berthelsen ullumi sisamanngornermi 64-inik ukioqalerpoq. Taassuma kissaatigisimavaa, nunami maani sulisartut partiiannik pilersitsisoqassasoq, isumaqarami partiit atuuttut sulisartut atugaannik ernummateqarpallaanngitsut.
Sulisartut kattuffiat partiimik pilersiteqataasinnaasoq maanna oqaatigaa.
Siulittaasoq sapaatiummat sulisartut nunarsuaq tamakkerlugu ulluanni nutaamik partiiliortoqarsinnaasoq, sulisartut sinnerlugit oqaaseqarsinnaasumik ujartuisimavoq. Jess G. Berthelsenip isumassarsiani Sermitsiaq.AG-mut itisilerlugu oqaaseqarfigaa.
Siulersuisut maajip naanerani ataatsimiissasut
- Oqaaserisimasara SIK-p siulersuisuunerisa maanna oqaluuserisussanngorpaat. Ataatsimiinnermi tullermi tamanna oqaluuserisassanngortinneqarsimavoq, siulittaasoq oqarpoq.
SIK-mi siulersuisuunerit maajip naanerani ataatsimiissapput.
Jess G. Berthelsenip ilisimatitsissutigaa, partiimik nutaamik pilersitsinissamik isumassarsiaq siulersuisuunerit isumaqatiginerlugu isummerfigissagaat.
- Siulersuunerit tassaapput SIK partiimik nutaamik pilersitseqataasinnaanersoq pillugu isummertussat, qularutigineqassanngilarlu tamatuma oqaluuserineqarnissaa, siulittaasoq oqarpoq.
Oqaaseqarusunngitsoq
Siulittaasup oqaatigaa, partiimik nutaamik pilersitsinissaq pillugu oqallittoqarnissaa soqutiginartoq.
- Ullumikkut partiiusut sulisartunik soqutiginninnersut pillugu oqallittoqarnissaa pitsaassaqaaq. Nunami aningaasaqarnikkut siuariartortoqarnissaa pisariaqartinneqarpoq, maannakkorpiarli nunamut nutaanik isaatitsissutigineqarsinnaasunik pilersaaruteqartoqanngilaq. Nunatta Karsiata aningaasanik amerlanerusunik imaqartinneqarnissaa pisariaqartipparput, taamaammat nunami maani uranitalinnik uranitaqanngitsunilluunniit aatsitassarsiortoqarnerunissaa sorsuutigaara. Ilassortattami aningaasarsiatigut pitsaanerusumik atugassaqartinneqarnissartik pisariaqartippaat, SIK-mi siulittaasoq erseqqissaavoq.
- Polikkerinngulerpit?
- Tamanna maannakkorpiaq oqaaseqarfigisinnaanngilara, Jess G. Berthelsen oqarpoq.