Skip to main content

SIK-mi siulittaasoq: Narsami aatsitassarsiorfissaq ammarneqarli

Inuunermi atugassarititaasut ajornerulersinngikkaluarlugit nuna namminersulivinnissamik neriuuteqassappat ineriartortitsinissaq pisariaqarpoq, aamma aatsitassarsiorneq inuussutissarsiutillu nalinginnaasut ataatsikkut ingerlanneqarsinnaapput. Taamatut SIK-mi siulittaasoq Jess G. Berthelsen ataasinngormat oqariartuuteqarpoq.

 VVM aanna VSB pillugit nalunaarusiat tusarniaassutigineqarnerannut atatillugu Kuannersuarni aatsitassarsiorniarneq pillugu Kujataani innuttaasunik ataatsimiisitsinerit siulliit sapaatip akunnerani kingullermi ingerlanneqareersut, SIK-mi siulittaasoq Jess G. Berthelsen suliniut pillugu taamatut erseqqissumik oqariartuuteqarpoq.

- Inuppassuuvugut namminersulivinnissamik takorluugaqartut, tassa naalagaaffinngornissamik takorluugaqartut. Nutaanillu isertitaqanngikkutta tamanna angujuminaattupilussuuvoq, taanna oqarpoq.

Taassuma oqaatigaa, ukiuni 30-ni kingullerni nunalerineq, savaateqarneq takornariaqarnerlu ineriartortitassatut oqaluuserineqarsimasut. Taamaakkaluartoq nikeriartoqangaatsiartoqarsimannginnerarpaa.

- Inuiaqatigiittut savaatilinnut, Neqi A/S-imut ammerivimmullu aningaasaliissuteqartarpugut. Taakkumi niuernikkut imminnut napatissinnaanngimmata nunatta karsianit tapiissuteqartoqartariaqartarpoq.

Pitsaanerusumik inuunermi atugaqartoqassappat aningaasat nutaat pisariaqartinneqartut

Taamaammat Jess G. Berthelseni isumaqarpoq, inuunermi ajortumik atugaqarnermi innuttaasorpassuillu suliffissaaleqineranni ajornartorsiutaasunut aatsitassarsiorneq aaqqiissutaasinnaasut ilagigaat.

- Meeqqama ernguttamalu ilaasortannit pitsaanerusumik inuunerminni atugaqarnissaat kissaatigilluinnarpara. Kuannersuarni aatsitassarsiortoqassappat suliffissat ataavartut 715-it pineqarlutillu ukiumut akileraarutitigut isertitassat 1,5 milliarder koruunit pineqarput. Aningaasat taakku inissianut nutaanut, atuarfinnut, napparsimmavimmut uagutsinnullu innuttaasunut tamanut pitsaanerusumik kiffartuussinissamut atorneqarsinnaapput.

Kuannersuarni aatsitassanik qaqutigoortunik uranitaqalaartunillu piiaaniarneq innuttaasorpassuarnit politikkerinillu isornartorsiorneqarsimaqaaq, taakkumi aatsitassarsiorfissap suliffinnut atuutereersunut ajoqusiisinnaanera aamma inunnut, uumasunut avatangiisinullu ajoqusiisinnaanera ernummatigaat. Ilaatigut najugarisap eqqaani uranisiornerup kinguneranik pujoralaat siammarternissaa, eqqakkanik qinngornernik ulorianartunik kemikalianillu akulinnik toqqorsiveqarnissaq ernummatigineqarluni.

SIK-mili siulittaasoq ernummatigineqartunut isumaqataanngilaq. Taassuma erseqqissaatigaa, Kuannersuarni suliniut eqqarsaatigalugu isumannaallisaanissamut sakkortuunik piumasaqaateqartoqarmat aatsitassarsiorfik peqqissutsimut, avatangiisinut suliffinnullu atuutereersunut ajoqutaanngitsumik ingerlanneqarsinnaasoq.

- Assersuutigalugu Norgemi ullumikkut uuliasorneq, aatsitassarsiorneq aalisarnerlu akornutaanngitsumik ataatsikkut ingerlanneqarpoq. Aamma Canadami taamatut ingerlatsisoqarpoq. Aatsitassaq 20 procenti angullugu uranitalik piiartarpaat. Aatsitassarsiorfiit ilaat kinguaariiaappassuarnik sulisoqarlutik ingerlasimapput. Taakkununnga sanillersuukkaanni Kuannersuarni aatsitassat piiarneqarniartut 0,03 procentiinnarmik uranitaqarput, Jess G. Berthelsen oqarpoq.

Sulinermi atugassarititaasut pitsaasuussasut

Taassuma erseqqissaassutigaa, SIK sulisartut kattuffiattut aatsitassarsiorfimmi sulisut sulinerminni pitsaasunik atugaqarnissaannik qulakkeerinneqataassassoq, soorlu suliffeqarfinni allani ajoquserfiusinnaasuni taamatut qulakkeerinnittartoq, tamatumanngali peqatigitillugu innuttaasunut politikkerinullu kaammattuutigaam suliniummut nutaamut tassunga ammanerusumik tigusissasut.

- Paasissutissanik qularnaatsunik atorneqarsinnaasunillu pissarsissaagut, siumoortumillu tamanut naaggaareertarata. Amutsivinni aalisakkerivinnilu sulineq aamma ulorianartortaqarsinnaavoq, tassa mianersunngikkaanni aamma isumannaallisaanermi malittarisassanik malinninngikkaanni, Jess G. Berthelsen naggasiivoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER