SIK Inuusuttai: Qaffaaneq annikippallaartoq
Ilinniartut ilinniagaqarnermusiaat 1. januar 2023 aallarnerfigalugu qaffanneqarput. Qaffaat aningaasanut inatsisip isumaqatiginninniutigineqarnerani ilanngunneqarpoq, akit qaffakkiartorneranut malinnaatitsisussatut atorneqassalluni. Tamanna naammanngerujussuarpoq, SIK Inuusuttai isumaqarput.
Nersussuup neqaa aserortigaq kilop affaanik oqimaassusilik, spaghettit poortat ataatsit, ketchup puiaasaq ataaseq, hakkede tomatillu qillertuusaq ataaseq.
Nioqqutissat taakku akikillisaatinnagit 130 koruunit missaannik akeqartarput. Nioqqutissat taakku naligisa annertoqatipajaavinik, tassa qaammammut 134 koruuninik, ilinniartut ilinniagaqarnermusiaat 1. januar 2023 qaffanneqarput.
Naammanngillat, SIK Inuusuttaanni siulittaasoq, Peter B. Mølgaard oqarpoq.
- Nerisassat akitsoriartortillugit ilinniartut inuuniarnermi malinnaaniapiloorput. Qaffaatigineqartoq 134 koruuni, inuussutissanut eqqarsaatigissagaanni, naammanngilaq, Peter B. Mølgaard Sermitsiaq.AG-mut oqarpoq.
Pitsanngorsaatit malunnaatillit kissaatigigaat
Ilinniartut 18-inik ukioqalereersimasut qaammammut 134 koruuninik ilinniagaqarnermusiani qaffaavigineqarput. Ilinniartut suli angajoqqaaminni najugaqartut qaammammut 63 koruuninik qaffaavigineqarlutik.
Qaffaat annikipallaartoq, Peter B. Mølgaard isumaqarpoq, peqqissaanermillu ilinniarfimmi ilinniartut assersuutigalugit. Taakku ilinniarfimmi atuagarsornermi ataatsimi atuakkat 3.400 koruunit naliginik akeqartut pisiarisussaavaat. Atuakkallu ataatsikkut akilertariaqarlugit.
Kattuffiup inuusuttaasa ilinniagaqarnermusiat qaffanneqarnissaat siusinnerusukkut noqqaassutigereerpaat. 134 koruuninilli qaffaaneq isaassineq annikippallaarujussuartoq, SIK Inuusuttaasa oqaatigaat.
- Nioqqutissat akitigut qaffakkiartornerat isigineqartariaqarpoq. Atuakkat atugassat pisiarinerini aningaasartuutit isigineqartariaqarput. Akit qaffakkiartortut tamanik eqquipput, aamma ilinniartunik, Peter B. Mølgaard oqarpoq.
Inooriaatsimik toqqaaneq
Ilinniartut qanoq inooriaaseqassanerlutik namminneq aalajagingassarigaat, taanna oqarpoq. Ilisimanerarpaalu ilinniartoq pujortartaruni mamakujuttunilluunniit pisikulaguni, aningaasaqarniarnera ajornerusinnaasoq.
Ilinniartulli meerartallit inuuniarnermikkut aamma eqqorneqarujussuartut taassuma oqaatigaa, niuertarfinnimi akit qaffakkiartortillugit pisissutissat annikilliartuinnavipput:
- Ilinniartut meerartallit, kisermaat ilinniartut meerartaqartut, taakkuupput nerisassanik, nangernik meeqqallu alliartortup atisassaanik aamma namminneerlutik aningaasartuuteqartussat. Qaammammut qaffaatimininnguit naammanngillat, oqarpoq.
Qanormi annertutigisumik qaffaasoqassagami?
- Naalakkersuisut isigisariaqarpaat akit qaffakkiartornerat, innaallagiap qaffakkiartornera, aningaasallu naleerukkiartornera. SIK Inuusuttaannit qanoq qaffaatigisoqassanersoq taasissanngilagut. 134 koruunilli aamma hurraartuutiginngilagut, annertunerusariaqarput, Peter B. Mølgaard oqarpoq.