Hot

SIK: Iliuuseqarit, Mette

Ini-p inissiaataasa aserfallatsaalineqannginnerannut naalakkersuisuusarsimasut pisuutittarnerat atorsinnaajunnaarpoq. SIK-p siulittaasuata Jess G. Berthelsenip tamatumunnga akisussaasoq qinnuigaa iliuuseqaqqullugu

– Piviusumik isorinninnerit tusaaniartarlugit, Mette Lynge, Jess G. Berthelsen Naalakkersuisunut ilaasortamut allakkamini ammasuni allappoq.

– Mette Lynge. Siunnersorusuppakkit. Iliuuseqarit qinersisartussinni saqqumilerniassagassi. Tamakkua atorfinitsissimavaasi.
Taamatut SIK-p siulittaasua Jess G. Berthelsen ineqarnermut Naalakkersuisumut Mette Lyngemut, Partii Inuit, allakkatigut ammasutigut allappoq, isumaqarluni ineqarnermut Naalakkersuisoq imminut ulorianartorsiortittoq.
– Matumani soorunami eqqarsaatigaara inissiat namminersornerullutik oqartussanit pigineqartut pillugit akerleriinneq ingerlasoq - minnerunngitsumillu kiassarnermut akiligassarujussuit, attartortut ilarpassuinut nassiunneqarsimasut, pillugit Ini-p inissisimanera.
Aamma atuaruk: Kiassarnermut akiligassaq akilerneqassaaq
– Attartortut amerlavallaartut ajornartorsiulersimapput kiassarnermut akiligassat pissusissamisuunngitsumik qaffasippallaarujussuarnerat pissutigalugu, tamannalu peqatigalugu piviusumik takussaasumillu iliuuseqartoqarani assersuutigalugu igalaat asiusimasut ussiitsullu taarsersorlugit, matunik silarlernik atorsinnaasunik atasinnaasunillu ikkussuilluni, inissianut ataasiakkaanut kiassarnermut uuttuutinik ikkussuilluni attartortut ataasiakkaat namminneq kiammik atuivinnerminnik malinnaasinnaaqqullugit, Jess G. Berthelsen allappoq, isumaqarporlu atorsinnaanngitsoq Mette Lynge akissummini allammat pissutsinut pissutaasut siusinnerusukkut naalakkersuisuusarsimasut politikkiat:
– Politikerit akisussaasut maanna ukiuni qulikkaarpassuanngulersuni sumiginnaanernut tamakkununnga siusinnerusukkut naalakkersuisuusarsimasut pisuutittarpaat. Tunngavilersuut tamanna atorsinnaajunnaarpoq. Ullumikkut ukioq 2013-imiippugut.
Jess G. Berthelsen allappoq attartortut 6.200-t sinnerlugit kissaatiginartillugu qanittukkut politikkikkut iliuuseqarnissamut pilersaarummik aallartitsisoqassasoq isumaqarlunilu ileqqorissaarnerusoq piviusumik isorinninnernut tusaaniarnissaq - aamma sulisartoqarnermi illua'tungeriinnut.
– Mette Lyngemi nammineq paasissutissiivoq aserfallatsaaliinerinnarmut maanna aningaasatigut kinguaattoortoqarsimasoq 1 milliard koruunit sinningaatsiarlugit. Aamma maluginiarpara ineqarnermut naalakkersuisoq siunissami qanoq pisoqartariaqarneranik apeqqummut akissummini ilaatigut inerniliimmat - ´Siumut isigisumik uagut - atuaruk Naalakkersuisut - sulissutigisariaqarparput inissiat ingerlanneqarnerisa qulakkeernissaa, inissiat ingerlanneqarnerat akissarsianik isumaqatigiinniarnertigut aalajangernagu´- issuaaneq naavoq, Jess G. Berthelsen allappoq.

Powered by Labrador CMS