SIK ilaqutariit feeriarnissaannut akiliussisoq
Ilaqutariit 500-t sinnillit sulinngiffeqarlutik angalanissaminnut SIK-p Slinngiffeqarluni Angalanermut Aningaasaateqarfianit akiliunneqarput
SIK-p Sulinngiffeqarluni Angalanermut Aningaasaateqarfiata ilaqutariit 559-it 2020-mi Kalaallit Nunaanni imaluunniit Danmarkimut sulinngiffeqarluni angalanissamut makitaasimasut allakkanik nassissorpai. Allakkat e-mailikkut nassiussuunneqarput, e-maileqanngitsut allakkerivikkoorlugu pissavaat.
SIK tusagassiorfinnut nalunaarummini taamatut allappoq.
- 2020-mi sulinngiffeqarluni angalanissamut qinnuteqaatit 4060-it tiguneqarsimapput. Taakkunannga 3022-t makitsinermi peqataanissamut akuerisaapput, 559-it atorsinnaananatik 479-illu ukiut kingulliit sisamat ingerlaneranni makitaareersimasuullutik. Tassa ukiut kingulliit sisamat ingerlaneranni makitaareersimagaanni makitsinermut peqataasoqarsinnaannginnami, sulisartut kattuffiat tusagassiorfinnut nalunaarummini taamatut ilisimatitsivoq.
Ti millioner koruunit sinnerlugit
SIK-mi sulisut sinniisaat 2019-imi aggustusip 23-ani makitsipput.
- Sulinngiffeqarluni Anglanermut Aningaasaateqarfiup siulersuisui aalangersimapput 2020-mi sulinngiffeqarluni angalanernut 12 mio. kr.-it atorneqassasut. Taamalu ilaqutariit 559-it akiliunneqarsinnaalerput. 2019-imi 9,9 mio. kr.-it siunertamut tamatumunnga aningaasaliissutaapput, tamannalu ilaqutariit 469-it nuannaarutissarsiffigaat, SIK-mit taamatut oqartoqarpoq.
Qinnuteqarsimasut makitaasimanngitsut erseqqissumik nalunaarfigineqassasut ilisimatitsissutigineqarpoq.