SIK aaqqiissuteqarpoq: Danmarkimut billetsi allanngortinneqarsinnaavoq
Inuit 177-it Danmarkimut angalanissamut makitaasimasut maanna SIK-p Sulinngiffeqarluni Angalanermut Aningaasaateqarfianit neqeroorfigineqarput tamatumunnga taarsiullugu Kalaallit Nunaanni angalanissaannut. Ilaqutariinnik periarfissamik atuisimasut Sermitsiaq.AG-mit oqaloqatigineqarput.
Danmarkimi coronavirusimut inissisimanera pissutaalluni SIK angalanissamut makitaasimasunut Danmarkiliartussaagaluartunut aaqqiissuteqarput. Billetsimi Nunatsinni atorneqarsinnaanera periarfissiissutigineqarpoq.
SIK tusagassiutinut nalunaarummi allappoq.
- Tamatumani ilaatigut pineqarput ilaqutariit 2021-mi angalanissaminnut makitaasimasut, ilaatigullu pineqarlutik allat 2020-mi angalanissaraluaminnik atuinngitsoorsimasut, ilisimasitsissutigineqarpoq.
Ilaqutariit Nuummukartut
Aasiannit Karl Kristian Broberg, nualini meeqqatillu marluk ilagalugit, angalanissartik allanngortippaat.
- Danmarkiliartussaanikuugaluarpugut, coronavirusili pissutigisaanik angalanerput allanngortipparput. Nuummiippugut apriilip aallaqqaataanit sapaatit akunnerini marlunni. Meeqqat nuannisaqaat, naluttarfiliallattaapput, Karl Kristian Broberg Sermitsiaq.AG-mut oqaluttuarpoq.
Aasiaat taamatut periarfissaq atorlugu qimalaarnerat iluarusuutigaa.
- Makitaasimanngitsuugutta ilimaginngilara allarsimassagaluarnersugut. Taamaattumik Nuummiilaarluni nuanneqaaq, oqarpoq.
Akunnittarfimmi unnuinertalerlugu
Tassa nunani tamalaani coronap tunillaassornerata kingunerisaanik angalaniarnermi pissutsit atuutilersut SIK-p Sulinngiffeqarluni Angalanermut Aningaasaateqarfia pilersaarutiminik iluarsiissuteqartariaqalerseqqippaat.
- Periarfissinneqarputtaaq ullut arfineq-marluk tikillugit hotelimiissinnaanissaminnut, apeqqutaalluni nunatsinni angalanissaq pineqartoq Københavnimut bilitsimit nalinginnaasumit qanoq akisunerutigissanersoq, SIK allappoq.
Periarfissaq taanna Danmarkimut angalanissamut makitaasimasunuinnaq atuuppoq.