isumaqatigiinniarnerit
SIK aamma Sulisitsisut nutaamik isumaqatigiissuteqarput
Sulisartoqarnermi illua' tungeriit angisuut taakkua marluk eqqissisimalluinnartumik akissarsianut isumaqatigiissuteqarput ukiuni pingasuni atuuttussamik
Namminersortuni SIK-p isumaqatigiissutai malillugit atorfilinnut ukiunut tulliuttunut pingasunut akissarsiatigut isumaqatigiissutit inissinneqarput.
Sulisartut kattuffiat SIK aammalu Sulisitsisut/Grønlands Erhverv, illua'tungeriit oqarnerattut ´naatsumik angusaqarfiusumillu isumaqatigiinniarnerup kingorna´ sammisaqarfinnut sisamanut akissarsiatigut isumaqatigiissuteqarsimapput.
Isumaqatigiissuteqarfiusut tassaapput:
Sanaartorneq
Kiffartuussineq assartuinerlu
Tunisassiorneq
Allaffimmiut HK
2019-ip tungaanut
Isumaqatigiissutit nutaat atuutissapput ukioq manna apriilip aallaqqaataanit 2019-imi marsip 31-iannut.
Illua'tungeriit makkua isumaqatigiissuteqarfigaat:
Gruppini pineqartuni akissarsiatigut atorfeqarnermilu atugassarisat pitsaanerusut
Isumqatigiissuteqarfigisani tamani akissarsiat qaffanneqarnerat
Sulisut sinniisoqarneq nukittorsarneqassasoq ilinniagaqartitsinermut aningaasaliinikkut, taannalu Sulisitsisut akilissagaat
Tamatuma saniatigut SIK-p aamma Sulisitsisut/Grønlands Erhverv-ip isumaqatigiissutigaat erninermut atatillugu aningaasaateqarfimmik pilersitsinissaq pillugu ataatsimut Naalakkersuisunut saaffiginninniarlutik.
Illua'tungeriit tusagassiorfinnut nalunaarutimikkut paasissutissiissutiginngilaat akissarsiat qanoq qaffariartigissanersut.
Akuerineqarput
SIK-p aamma Sulisitsisut/Grønlands Erhverv-ip isumaqatigiissutit nutaat akuersissutigaat.