Skip to main content

Siemens Nuummi allaffittaarpoq

– Ineriartornerup piffianiissaagut, Siemens Grønlandip pisortaa Carsten Dahl oqarpoq

Sisamanngormat Siemens Nuummi nunatsinni allaffittaarpoq.
Taamaasiorpoq naatsorsuutigineqartumik aatsitassarsiornerup ineriartorneranut piareersimaniarluni.
Pingaarnertut sammisassaq tassaavoq aatsitassarsiornermut nukissamik mingutsitsinngitsumik tunisassiornissaq, Siemens Grønlandip pisortaa Carsten Dahl oqarpoq.
– Piffik atugaq Kalaallit Nunaannut pissanganartuuvoq. Aatsitassaqartorujussuuvoq tamakkualu atorniarnissaat ilimanaatilerujussuuvoq. Tamanna peqatigalugu sumiiffinni allanisulli tamakku atorniarnerat pissaaq avatangiisit mianerilluarlugit. Kalaallit Nunaanni allaffimmik ammaagatta tamatumunnga pissutaavoq naatsorsuutigigatsigu pisuussutit tamakkua atornissaannut Inatsisartut piffissami ungasinngitsumi aatsitassiorfinnik ingerlatsinissamut akuersissutinik tunniussiumaartut. Carsten Dahl tusagassiorfinnut nalunaarutikkut nassuiaavoq.
Siemens Grønland Danmarkimi Siemens A/S-ip immikkoortortaraa. Tassanngaanniit atorfilittat suliniutinillu ingerlatsisussat tikissapput, suliassarpassuarnik ingerlatsisussat. Aatsitassarsiornerup siuariartornissaanik ilimagisaq ilumuussappat Nuummi allaffimmut, ukiunut pingasuugallartunut attartorneqarsimasumut, sulisut amerlanerit tikisinneqassapput.
– Aatsitassarsiorfissuarnik pilersitsisoqassappat tamakkua ingerlanneqarnissaannut nukissarujussuaq atorneqassaaq. Maani Kalaallit Nunaanni assersuutigalugu isumassaqarluassaaq sermip aanneranit tatsini hydroenergi-p aammalu sakkortuumik ulittarneranit tinittarneranillu nukissialiap atorneqarnissaat piiaaffiit ingerlanneqarnissaannut. Tamakkua aaqqiissutissaapput nungusaataanngitsut, annertuumik pitsaasumillu misilittagaqarfigisavut, Carsten Dahl oqarpoq.
Carsten Dahlip True North Gems aamma London Mining kiisalu Greg Barnes Kujataani aatsitassat qaqutigoortut pillugit attaveqarfigereersimavai.
Nuummi illut nutarsarneqarnissaat
Siemens-ip Nunatsinni allaffittaavani sammineqartussaq alla tassaavoq illut nukissamik sipaarnartumik nutarsarneqarnissaat.
– Silap sunniutai sakkortuujupput, illullu siunertalimmik oqorsarneqarsimanngippata nukissarujussuaq maangaannartinneqartarpoq. Nuummi illut ilarpaaluisa nukissamik sipaarnerulersinnissaannut Kommuneqarfik Sermersooq siullermeersumik isumaqatigiissuteqarfigeqqammerparput. Sammisaq tamanna attanniarparput Kalaallillu Nunaata ilaanut siammarsarniarlutigu. Illut oqornerulernissaannik nukissamillu sipaarnerulernissaannik suliassaq kalaallit sanasut suleqatigalugit ingerlatissavarput. Taamaattumik suliniutit kikkut tamarmik iluaqutigissavaat, Carsten Dahl tusagassiorfinnut nalunaarutikkut oqarpoq.
Taassuma oqaatigaa sapaatip akunnerani tullermi ingeniørinik Nuummut tikittoqariissasoq illunik takuniaajartortunik.
Siunertaavoq nukissamik atuinermi sipaakkat suliniut akilissagaat, taanna nassuiaavoq oqarlunilu nukissamik sipaarniarnermik suliniutit assersuutigalugu ilinniagaqarfinnut najugaqartullu peqatigiiffiinut neqeroorutigineqarsinnaasut.
Sammisaqarfiit pingajuat Siemens-ip peqataaffigerusutaa tassaavoq peqqissuunermut tunngasoq, ilaatigut IT-mi aaqqiissutissat neqeroorutigineqarsinnaallutik, assersuutigalugu journaleqarfitsigut.
Siemens assinik suliarinninnermi, laboratoriami nappaammik suussusersinermi IT-milu aaqqiissutissanik, eqqorluartumik nappaammik suussusersinermut siusissukkullu nappaatinik pinaveersaartitsinermut tunisassianik nutaaliaasunik ineriartortitsisarpoq.
– Nunarsuarmi peqqinnissaqarfimmut pilersuisut annersaraatsigut.
Carsten Dahlip oqaatigaa Siemens aaqqiissutissanik Kalaallit Nunaannut pilersuereersimasoq ilaatigut erngup nukinganik nukissiorfinnut, tamatumani turbininut aqutsissutinik pilersuisimalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER