Sibiriami nunami ikuallannerujussuit aserorterisut
Oqartussat aningaasanik amigaateqarput orpippassuarnilu ikuallannerujussuarnut akuliunnissartik sumiginnarlugu.
Ruslandimi orpippassuarni ikuallannerit nunap ilaani Krasnoyarskimi Sibiriami 963.000 hektarinut siaruaassimavoq.
Russit nutaarsiassaqartitsiviat Tass naapertorlugu nunap immikkoortuani qatserinermut sullissiviat taama nalunaarpoq. Ikuallannerit Sjællandip Fynillu angissusingajaannik siaruaqqapput.
- Paasissutissat kingulliit malillugit orpippassuit ikuallattut 118-it nunap ilaani nalunaarsorneqarsimapput. Najugaqarfiusunut ulorianartorsiortitsinngillat, taama nunap immikkoortuani qatserinermut sullissivimmiit nalunaartoqarpoq.
Orpippassuarni nunamilu ikuallannerit amerlanerpaartai tikikkuminaatsumiipput, nunallu ilaani ikiuigasuarnissamik upalungaarsimasuisa qatserisartunik ornigutsinneqassanersut kisimik aalajangersinnaavaat. Ikuallannerit katillugit 940.000 hektarini siaruaqqapput.
Qatserisartut 1300-t qatseritinneqarput qatserinermilu timmisartut qulimiguulillu atorneqarput.
Nunap ilaani ajornartoorfimmi najoqqutassatut maleruagassaliorsimapput, orpippassuaqarnermullu ministeria oqarpoq silaannaap panernera kianneralu aammattaaq sakkortuumik anorlernera kallerneralu ikuallannernut peqqutini annerpaasut.
Svetlana Tuflyakova nunap ilaani Krasnoyarskimi nunaannarmi illoqarfimmi Bogutjanijimi najugaqarpoq – 100 kilometerit missaanik ikuallattuniit ungasissusilik – sapaatip akunnerata aallartilaarnerani AFP-mut oqarpoq inneq malugineqarsinnaasoq.
- Iluamik anersaartorsinnaanngilagut. Ikuallannerup pujuaniit allamukarluta qimaasinnaanngilagut. Meeqqat inersimasullu kipisuitsumik quersorput, taanna oqarpoq.
Ukiut tamaasa Sibiriami pinngortitami ikuallanneqarujussuartarnera nalinginnaavoq, aasarli manna pujoq illoqarfinnut minnernut annernullu apuussimavoq – Krasnoyarsk ilanngullugu.
Taakani najugallit najukkaminni oqartussat iliuuseqanngippallaarnerat isornartorsiorpaat. Amerlanersai ikuallannernut annerusumik aaqqiissuteqarnissamut aningaasaateqarpianngillat akissaqaratillu.
Oqartussat orpippassuarni ikuallannernut aaqqiissuteqarnissartik sumiginnaanerannik amerlasuut isumaqarnerat uppernarsineqarpoq Krasnoyarkip guvernøria, Alexander USS, juulimi oqarmat orpippassuarni ikuallannerit qaminneqarnissaat “isumaqanngitsoq ulorianarsinnaasorlu”.
Assilisat videollu “Sibiria ikuallappoq”-mik qulequtserneqarlutik internetikkut attaveqartarfinnut ikkunneqarsimapput.