SF’ereq qulaarsineq pillugu: Politiit utoqqatsertariaqaraluarput

Sapaatip akunnerata naanerani saqqummiunneqartutut Københavnip Politiivinit nassuerutigineqarpoq - dagbladet Politiken qulaarsereersorlu - Købehavnip Politiivi angerlarsimaffeqanngitsup, Amagerbro metrostationillu eqqaani silaaruteqqasup, Daniel Øhlersip sumit kingoqqivianut apeqqutilleeqqaarsimasut, arnarlu sanioqquttoq apeqqummut tassunga qaqiliisimanngitsoq.

SF sinnerlugu Københavnimi Regionsrådimi ilaasortap, Jens Mandrup Rasmussenip, Daniel Øhlersip toqunerata qallunaat tusagassiuutaanni saqqummiunneqaqqaarmalli ernummatigaa immikkoortitaasimasinnaanera.

- Peqqinnissaqarfimmi sulisut eqqarsarlutik ’kalaaliinnaasoq’ pilertornerusumik qisuariarsimanngippata, taava soraarsinneqartariaqarput. Immikkoortitsineruvormi, Jens Mandrup Rasmussen SF-imeersoq Daniel Øhlersip Amagerbro metrostationip eqqaani inuit angallatileruttornerisa nalaani toqunerata aqaguani Sermitsiamut taamani oktobarimi ilaatigut taama oqarpoq.

Atuaruk: Nielsenip qulaarsineq tupaatigaa - justitsministeri attaviginiarpaa

Politiit miserratiginninnerat kanngunarpoq
Københavnimi Regionsrådimi ilaasortaq maanna isumaqarpoq Københavnip Politiivi utoqqatsertariaqaraluartut.

- Siullermik kanngunarpoq Københavnip Politiivinit Daniel Øhlersip sumit kingoqqisuusimaneranut aperisimanerminnut miserratiginneqqaarmata.

- Tulliattut isumaqarpunga Københavnip Politiivinit taama qulaarsineq ilumoorsaarunnagu tiguneqarmat.

Taama SF sinnerlugu Københavnimi Regionsrådimi ilaasortaq, Jens Mandrup Rasmussen Sermitsiaq.AG-mut oqarpoq, nangillunilu:

- Akuersaarneqarsinnaanngilarmi politiit Daniel Øhlers sumit kingoqqisuunera pillugu apeqquteqarsimammata. Apeqqutaanngilarmi kalaaliunersoq qallunaajunersorluunniit. Angununa inuuniluttoq ikiorneqarnissaminillu pisariaqartitsisoq.

- Isumaqarpunga Københavnip Politiivi utoqqatsertariaqartut, neriorsuillutillu taama pisoqaqqinnginnissaanut.

Atuaruk: Angerlarsimaffeqanngitsup toquneranut kukkusoqarsimanera nassuerutigineqarpoq

Politiit malittarisassaminnik sukaterisariaqaraluarput
Danmarkimi Region Hovedstadenimi nammineq iluminni pisoq pillugu misissuereerlutik aalajangiuppaat pinasuartoqarnerani sullissisartut malittarisassaat malinneqarsimanngitsut angut 32-nik ukiulik angerlarsimaffeqanngitsoq kalaalerlu, Daniel Øhler, ambulancenik utaqqinerup nalaani toqukkut qimagummat.

- Daniel Øhlersip toqunerata kingorna 112-ermiut malittarisassatik sukaterpaat. Københavnip Politiivi aamma taamaliortariaqaraluarput, Jens Mandrup Rasmussen Sermitsiaq.AG-mut oqarpoq.

Innuttaasut katillutik arfinillit oktobarip arferngani ikioqqullutik sianeraluarput, sianertullu siulliup Kirstine Løvdal Nielsenip politiit telefonnormukkut 114-ikkut nalunaaqutaq 15.03 attavigai. Apeqqutigineqartullu tullia tassaasimavoq ‘Qallunaajua imaluunniit kalaaleq?'

Atuaruk: Isiginnittoq: Sanioqquttut angut toquinnartariaqarnerarpaat

Assit takukkit: Angutip angerlarsimaffeqanngitsut toqunera pillugu ingerlaaqatigiinneq