Serverip ajoquteqarnera internetsip attaveerunneranut pissutaasoq
Tele-Postip serveriata ajoquteqarnera pissutigalugu Kalaallit Nunaanni internet marlunngormat unnukkut nalunaaquttap akunnerini pingasungajanni attaveqarsimanngilaq.
TAKUUK: Ilanngutassiaq Tele-Post nutaamik ilisimatitsissuteqarmat nal. 10.15 allanngortinneqarpoq.
Marlunngormat unnukkut qulingiluat qeqqanut Tele-Postip serveria ajoquteqalerpoq, tamatuma malitsigisaanik Kalaallit Nunaanni kikkut tamarmik internetsersinnaasimanngillat. Ajoqutaasoq nal. 23.15 aatsaat iluarsineqarpoq.
Taamaalilluni Kalaallit Nunaat nunarsuup sinneranut nunamilu innuttaasunut nukillalaartitsisumik internetsikkut attaveerussimavoq.
Mobilikkut qarasaasiatigullu internetsimut attaveqarniarneq ajornavissimavoq.
Back-up
Tele-Postimit nassuiaatigineqarpoq, DNS-ip serveriani ajoquteqartoqarsimasoq.
- Backupeqarpugut atorsimasatsinnik, attavileeqqinniarnerli naatsorsuutigisamit sivisunerusumik pisimavoq, Tele-Postimi it-mut atatillugu pisortaq Nikolaj Christoffersen Sermitsiaq.AG-mut nassuiaavoq.
Tele-Post taamatut ajoqusertoqaqqinnginnissaa anguniarlugu qanoq iliuuseqarniarpa?
- Attaveeruttoqartarnera teknikkikkullu ajoquteqartoqartarnera minnerpaaffimmiitinniarlugit atortuvut kiffartuussissutivullu pitsaaneruslersinniarlugit kiisalu taarsersorniarlugit suliaqarpugut. Taamatut suliaqarnerput ingerlatiinnassavarput, sullitavut pitsaanerusumik ingerlalluarnerusumillu attaveqartinniarlugit. Internetsip nunami maani inuppassuarnut pingaaruteqarluinnarnera qularinngilarput, ullullu tamaasa attaveqaatit pitsaanerusumik ingerlasarnissaat sulissutigiuarparput, Tele-Postimit akissutigineqarpoq.