qinersineq

Sermitsiaq.AG-p pisortaata avissaartuulluni politikkip ingerlaannarnissaa ersissutigaa

Kalaallit Nunaata aningaasaliisartut nunat allamiut pilerinnilersissagunigit siammasissumik naalakkersuisooqatigiit pisariaqartippai, Poul Krarup isumaqarpoq

Poul Krarup, Nutaarsiassaqartitsiviup Sermitsiaq.AG-p pisorttaa

Naalakkersuisooqatigiinnissamik isumaqatigiinniarnerit inernissaat Kalaallit Nunaata siunissaanut aalajangiisuusorujussuussaaq.

Taamatut naliliivoq Nutaarsiassaqartitsivik Sermitsiaq.AG-p pisortaa Sermitsiallu akisussaasutut aaqqissuisua Poul Krarup, Siumut Kim Kielsen siuttoralugu tallimanngormat qinersinermi Sara Olsvigimut Inuit Ataqatigiinnullu amerlanerussuteqalaarluni ajugaareersorlu.

Nunami partiit annerpaat marluk taasisui 326-iinnarnik nikingassuteqarput, Poul Krarupilu isumaqarpoq partiit taakkua marluk suleqatigiinngippata nuna kinguariartinneqassasoq.

– Inuiaqatigiit pissutigalugit pitsaanerpaassaaq suleqatigiikkunik. Sammisassarpassuaqarpoq imaasiallaannangajak suleqatigiissutigisinnaasaannik, aaqqissuisoq oqarpoq ilaatigullu partiit ineqarnermut politikkiat erseqqissaatigalugu.

Aamma isumaqarpoq partiit aamma aalisarnermut politikki, qineqqusaarnermi sammineqartorujussuusimasoq, isumaqatigiissutigisinnaassagaat.

– Tamatuma saniatigut IA-kormiut aningaasaqarnikkut aalajaatsumik politikkeqarusupput. Taakkua marluk suleqatigiippata tamanna aningaasaliisunut nunat allamiunut uppernassusermik aalajaassusermillu pilersitsissaaq, tamannarpiarlu atorfissaqartipparput, Poul Krarup oqarpoq.

Aammattaarli siammasissumik naalakkersuisooqatigiinnut illua'tungissaqarpoq.

Tassami tunuatungaaniippoq naalakkersuisut siulittaasorisimasaat Hans Enoksen, ukiup aallartinnerani Siumumit anilluni Partii Naleqqamik pilersitsisoq. Taanna Siumup naalakkersuisooqatigisimasaa Atassut peqatigalugu partiit pingasuullutik amerlanerussuteqalaarlutik naalakkersuisunngortitsisinnaalluarput, Poul Krarup isumaqarpoq.

– Ilimanarnersaavoq Kim Kielsenip Atassut aamma Parti Naleraq suleqatigilissagai, tassuuna ataatsimik amerlanerussuteqalaarnissani qulakkiissagamiuk. Taamaassappat avissaartuulluni politikkersorneq atoqqilissavarput, taavalu nunap atorfissaqartitaqisaanik piffissamut sivisuumut aaqqiissutissarsisinnaassanngilagut, aaqqissuisoq oqarpoq.

Kim Kielsen arfininngormat siusinnerusukkut oqarpoq aallaavittut partiit tamaasa naalakkersuisunik pilersitsinissamik isumaqatigiinniarfiginiarlugit.

– Partiit siulittaasui tamaasa oqaloqatigereerpakka, isumaqatigiippugullu ataasinngorpat isumaqatigiinnialissalluta. Tamaviaarnartumik qineqqusaareernerup kingorna ilaquttat piffissaqarfiginissaat pingaaruteqarpoq, piniartuusimasoq politiiusimasorlu oqarpoq.

Powered by Labrador CMS