Skip to main content

Sermitsiaq.AG-p pisortaa: Kukkunersiuinermut tunngasoq erloqinartorujussuuvoq

Pissutsit maanna atuuttut Naalakkersuisut siulittaasuannut naalakkersuisooqatigiinnullu erloqinartorujussuupput, Poul Krarup naliliivoq

Aleqa Hammondip kukkunersuiffigineqarsimanera Aleqamut namminermut naalakkersuisooqatigiinnullu annertoorujussuarmik tatisivoq.

Taamatut naliliivoq Poul Krarup, Nutaarsiassaqartitsiviup Sermitsiaq.AG-p pisortaa Sermitsiallu aaqqissuisuunera.

– Pissutsit Naalakkersuisut siulittaasuannut naalakkersuisooqatigiinnullu erloqinartorujussuupput. Siuilttaasup siulittaasuunini atornerlussimavaa landskarsillu aningaasaatai namminerminut atorlugit. Tamanna kikkunnit tamanit tatigineqarunnaarnermik kinguneqarpoq. Inatsisartut kukkunersiuinermut ataatsimiititaliaata pisimasumik misissuinera aalajangiisuussaaq, Poul Krarup oqarpoq.

– Apeqqutaavoq Aleqa Hammond eqqissisitsissanersoq namminerlu akunnermini naalakkersuisooqatinilu tatiginninnermik pilersitseqqilluni, taamaasilluni tatiginninnginnermik taasineq qaangersinnaallugu. Atassut tapersiissaguni pinngitsoorani pissarsissaaq. Aamma Siumup iluani aalassassimaartoqarpoq, tamatumanilu ilaat naammaginninngillat, tapersersussagunikkulu pissarsiassaqartariaqarlutik.

Maannakkorpiaq ajortoqarpasippoq

– Qularutissaanngilarli partiimi naalakkersuisuusumi maannakkorpiaq nalilersorneqartoq Aleqa siulittaasoq eqqortuunersoq, qulakkeerinnissinnaasoq tullianik qinersinermi Siumup ajugaanissaanik. Maannakkorpiaq ajortoqarpasippoq. Aleqa Hammondip suliassani naammassisimanngilai, partiip iluani, naalakkersuisooqatigiinni, nunami naalagaaffeqatigiinnilu avissaartortitsivoq, qineqqusaarnermilu neriorsuutini naammassisinnaasimanngilai. Politikki allarluinnaq ingerlanneqassaaq Siumup qinigaaffik manna anigussappagu tullianillu qinersinermi ajugaasinnaassaguni, Poul Krarup naliliivoq.

– Matumani pingaarutilik tassaavoq ineriartornermut kingullermut Partii Naleraq qanoq oqarnersoq.

– Pingaarutilik alla tassaavoq Inuit Ataqatigiit tatiginninnginnermik taasinissaq utaqqisinniarmassuk, kukkunersiuinermut ataatsimiititaliap misissuinerminik naammassereernissaanut, Poul Krarup erseqqissaavoq.

Ullut aalajangiisuusussat

– Partiip siulittaasua Sara Olsvig naapertorlugu Inuit Ataqatigiit marlunngorpat ukiakkut ataatsimiinnerup aallartinnerani Aleqa Hammondimik tatiginninnginnermik nalunaaruteqarniarpoq. Siumumeersoq Kristian Jeremiassen, Inatsisartut kukkunersiuinermut ataatsimiititaliaanni siulittaasoq, oqarnikuuvoq Inatsisartunut ilaasortat kisimik aalajangissagaat Aleqa Hammondimut qanoq kinguneqartitsisoqassanersoq. ´Qularnanngilarli pisimasoq puiguinnarsinnaanngikkipput´, soorlu Jeremiassen oqartoq. Qanoq isumaqarpit tatiginninnginnermik nalunaaruteqarneq qanoq inerneqassanersoq?

– Inatsisartut maanna ataatsimiinnissaanni marlunngorpat qanoq pisoqarnissaanut apeqqutaasorujussuuvoq ulluni makkunani partiip iluani qanoq pisoqarnersoq, Poul Krarup oqarpoq, taannalu Nutaarsiassaqartitsivik Sermitsiaq.AG-mi pisortaavoq Sermitsiamilu aaqqissuisuunerulluni.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER