Skip to main content

Sermitsiaq.AG-p Charlie Hebdo-mik aalajangernera Akkari-p taperserpaa

Imam-iusimasup Ahmed Akkari-p paasisinnaalluarpaa Nutaarsiassaqartitsiviup Sermitsiaq.AG-p Charlie Hebdo-p titartagai saqqummiussimammagit

– Ajorluinnarpoq inuit ilaasa nakuuserneq toqutsinerlu atortarmatigit, killiligaanani oqaaseqarsinnaatitaaneq pinngitsoortinniarlugu! Tamanna akueriinnassallugu assuarnarpoq ulorianarlunilu, tassa annertunerujussuarmik knguneqarsinnaammat. Taamaattumik aamma allappunga ajortuliornerit taamaattut nakkaannarfigineqartassanngitsut, isummalli saqqummiunneqartuaannartassasut.

Taamatut Sermitsiami sapaatip akunnerani saqqummersumi isumaliutersuummi allappoq imam-iusimasoq Ahmed Akkari.

Januaarip 7-aanni Paris-imi atuagassiami quiasaarummi sapaatip akunneranut saqqummersartumi Charlie Hebdo-mi inuit 12-it inuunerannik akeqartumik toqoraanersuup kingorna Nutaarsiassaqartitsiviup Sermitsiaq.AG-p isumaliutigaa Charlie Hebdo-p titartagaasa ilai ilanngunniarlugit, franskit atuagassiaanni tusagassiortartoqativut tapersersorniarlugit, aammalu atuartartutsinnut takutinniarlugu titartakkat suut ajortuliornersuaq tamanna pilersissimaneraat.

Tamatumunnga atatillugu quppernermi matumani taasisitsisoqarpoq, tamatumani alapernaanniaannavilluta - siunissamilu aaqqissuisoqarfiup pingaarnerutittagassaanut attuumassuteqanngitsumik - aperivugut Nutaarsiassaqartitsivik Sermitsiaq.AG Charlie Hebdo-p titartagaanik saqqummiussissanersoq.

Kingornatigut, saassussinerup kingorna Charlie Hebdo-p saqqaa siulleq nittartakkami matumani ilanngupparput, tassani angut turban-ilik titartarneqarsimalluni allagartalimmik ´Je suis Charlie´, aammalu Atuagagdliutit/Grønlandsposten-ip Charlie Hebdo-p siusinnerusukkut saqqarisimasaa ilannguppaa, tassani quiasaarutigalugit titartarneqarsimallutik Jiisusi, profiiti Muhammed Moses-ilu. Taanna ilanngunneqarpoq takutinniarlugu atuagassiap quiasaarutip Charlie Hebdo-p islam-isiortut kisiisa quiasaarutiginiartanngikkai, upperisalli arlallit taamaasiortarai - inuillu pissaanermik tigumminnittut aamma taamaasiortarlugit.

Sermitsiap Charlie Hebdop saqqarisimasai pingasut sapaatip akunnerani uani ilannguppai.

Sermitsiaq.AG nersualaarpaa
– Sermitsiap (Nutaarsiassaqartitsivik Sermitsiaq.AG, aaqqiss.) atuartartuni aperisinnaalluarpai, tamannalu peqatigalugu nammineq nalornissutigalugu qanoq iliornissaq eqqortuunerpaajunersoq. Tamanna pitsaanerpaamik iliorniarnermik takutitsineruvoq, neriuutiginngeqaarali tamanna naqillugulu oqaluuseriniarneqartoq, ajortuliortartunit pinerlineqarsinnaaneq ersissutigiinnarlugu. Tamanna kukkuneruvoq aaqqiissutissamullu sumulluunniit iluaqutaassanani, Ahmed Akkari Sermitsiami isumaliutersuummini tikkuaavoq, tassanissaarlu ingasaassiniarpallaaleriartornerup akiorneqarnissaanut aaqqiissutissamik saqqummiussivoq.

Imam-iusimasoq, Muhammed-imilu pillugu ajornartorsiornerup nalaani akerliuniaqatigiinni oqaaseqartartuusimasoq Ahmed Akkari 2014-imi aasakkut Narsamut nuuppoq tassani ilinniartittsisutut atorfeqarluni. Tassanissaaq aamma ilinniartitsisuusimavoq 2008-miit 2010-mut.

2014-imi apriilimi atuakkiani ´Mit farvel til islamismen´ saqqummersippaa, tassani oqaluttuaralugu Muhammed-imik ajornartorsiornerup, 2005-imi septembarimi aallartittup, nalaani, taamanikkut Jyllands-Posten-ip Muhammed-imik titartakkat 12-it ilanngummagit, tunuliaqutaasuni qanoq pisoqartarsimanersoq. Titartakkat taakkua aamma ilanngunneqarsimapput Nutaarsiassaqartitsivik Sermitsiaq.AG-p aviisiini nuna tamakkerlugu saqqummersartuni marlunni, Sermitsiami aamma Atuagagdliutit/Grønlandspostenimi.

Ahmed Akkari-p isumaliutersuutaa ´Akisussaassusilimmik killiligaangani oqaaseqarsinnaaneq´ tamaat Sermitsiami sapaatip akunnerani saqqummersumi atuaruk. Aviisi pisiariuk uani:

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER