Sermitsiap paasitissiissutaata borgmesteri ajuusaartikkaa
Borgmesterip Palle Jerimiassenip 2018-imi nuliami meeqqamilu timmisartukkut bilitsissai Avannaata Kommunianut akilertissimavai. Sermitsiaq suliamik qulaajaareermat aatsaat kingusinnerujussuakkut aningaasat utertitsinneqarsimapput.
Borgmesterip Palle Jerimiassenip Facebookikkut saqqummiussamigut, nuliami meeqqamilu timmisartukkut bilitsissai 2018-imi kommunimut akilertissimasani ajuusaarutigai.
- Kingumut qiviassanguma, tamatuma eqqortumik periusaannginnera eqqumaffiginerusariaqarsimagaluarpara, pisorli pereerpoq – tamannalu qamuun ajuusaarutigilluinnarpara. Uanga tamanna kukkussutigaara, erseqqissaatigerusupparalu taamatut pisoqaqqissanngimmat, borgmester Sermitsiamik Tusgassiornermik Nakkutilliisoqarfimmut tunniussilersaarluni nalunaaruteqartoq allappoq.
Ukioq ataaseq qulaajaasimaneq
Københavnimut sulinngiffeqarluni angalasimanermut atatillugu bilagit Avannaata Kommuniata qaammaterpassuarni tunniusserusunngereersoq, Sermitsiaq ukioq ataaseq sinnerlugu pineqartumik qulaajaaniarsimavoq.
Aviisip qulaajaaneranit takuneqarsinnaavoq, kommunip 2019-imi martsip arfineq-pingajuani aatsaat aningaasat utertillugit akileqqusimagai. Aviisip allagaatinik takunnikkusulluni piumasaqarnera malillugu allagaatit februaarip 24-ani nassiunneqarsimapput.
Aningaasarsianit ingerlaannaq ilanngaatigineqasssasut
Naalakkersuisut Siulittaasuata Naalakkersuisoqarfia kommuninik nakkutilliisuusoq naapertorlugu, aningaasat borgmesterip aningaasarsiaanit decemberip aallaqqaataanili kommunimit ilanngaatigineqarsimasariaqaraluarput, qaammaterpassuillu qaangiummata aatsaat akileqqusissummik nassinnagu.
Palle Jerimiassen isumaqarpoq Sermitsiap qulequtsiussaa – Borgmesteri akiliisitsiniartarfimmik sioorasaarneqartoq – eqqortuunngitsoq, tamannalu pissutaasoq Tusagassiornermik Nakkutilliisoqarfimmut naammagittaalliuuteqarsimaneranut.
Ilanngutassiaq atuaruk, Sermitsiamilu pisup qulaajaaffigineqarnera tamakkerlugu paasisaqarfigalugu – ugguuna iserfigisinnaavat: