Sermiminersuup inuit pisuinnaat marluk aqqunarai
Nuummi illoqarfiup qeqqani Brugsenip pisiniarfiata saavani sermimineq miiterisut takinerusumit nakkarmat, inuit pisuinnaat marluk sisamanngornermi ualikkut aqqunarujussuarput.
Inuit pisuinnaat marluk Brugsenip pisiniarfia saneqqullugu pisuinnaat aqqutaatigut pisupput – Hotel Hans Egedep akiatungaatigoorput kommunep allaffiata tungaanut – pisiniarfiup iigartaaniittoq sermeq miiterimit takinerusoq tassanngaannartumik napivoq, pisuttullu sumik ilimaasuteqanngitsut nakkarfigalugit.
Tunuannit aappariit aneerussivimmik kaassuarlutik ingerlapput, sermilli nakkarneranit eqqorneqaratik.
Ajuusaartut
Nioqquteqarfiup pisortaa Mark Kobberrød, pisoq pillugu ajuusaarpoq, pisiniarfiummi igaaniit aputit sermillu innuttaasunut ulorianartorsiortitsinnginnissaat anguniarlugu piiarneqarnissaat Brugsenip akisussaaffigaa.
- Tamanna ajuusaarnartorujussuuvoq. Pisiniarfiup illuatungaani aput sermerlu piffissami tassani piialereersimavarput. Suliassaq pingaartipparput ukiuuneranilu arlaleriarluta aputaajaallutalu sermiiaasarsimavugut, Mark Kobberrød Sermitsiaq.AG-mut oqarpoq.
Taassuma nassuerutigaa suleriuseq naammaginarsimanngitsoq, siunissamilu taamatut pisoqaqqinnginnissaa anguniarlugu suleriutsit misissoqqissaarneqassasut.
Sillimmasiineq pillugu apeqqut
- Inuit taakku marluk SANA-liaanneqartut attaveqarfiginngilagut. Neriuppugut kingunerluuteqaratik pitsanngussasut. Tamanna siullertut pingaarsaavoq. Taassuma kingorna soorunami sillimmasiinermi suliakkiunneqassaaq, ajutoornernut taama ittunut sillimmasernikuugatta, Mark Kobberrød nassuiaavoq. Taassuma oqaatigisinnaanngilaa taarsiivigineqarnissamut aningaasat qanoq annertutigissanersut.
- Taama pisoqarpat soorunami ersiutaavoq naammaginartumik iliuuseqarsimanngitsugut. Tamanna assut ajuusaarutigaarput. Pisiniartartutta uagutsinni niuernerminni akornusinnginnissaat soorunami soqutigisaraarput, Mark Kobberrød erseqqissaavoq.
Inuit aqqunartut marluk qanoq issusaat pillugu Sermitsiaq.AG paasiniaagaluarami ilisimasatinneqanngilaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...