Nunaqarfimmi Tasiilap pigisaani Sermiligaami toqutsisoqarsimagunarneranik nutaarsiassamik alianartumik arfininngornermi januaarip 1-ani 2022-mi tusarlerneqarpugut, aviisi AG allappoq.

Maanna, qaammatit sisamat missingisa qaangiunneranni, suliaq minnerunngitsumik Tunumi najukkami innuttaasut sakkortuumik aqqusaagaqartarsimasut, ullullu allat marluk qaangiunneranni Tasiilami angutip politiit isumaat naapertorlugu inooqatigisaminit toqutaasimagunarneranik tusarlerneqaqqittut, quarsaarutigisaat, maanna naammassillugu suliarineqartussatut isikkoqalerpoq.

Suliat taakkua marluk pissutigalugit kommunimi isumaginninnikkut oqartussat ajornartoornermi upalungaarsimasunik suliaqartitsisariaqalerput ilaatigullu tarnip pissusianik immikkut ilisimasalimmik Sermiligaamut aallartitsillutik.

Nunaqarfimmi toqutsisoqarsimasinnaaneranik tusagassiuutitigut nalunaarut politiinit, ullaakkut qulimiguulimmik nunaqarfiliarsimasunit, januaarip aallaqqaataani nalunaaqutaq 13.57 takkuppoq.

Paasiniaaneq pilertortumik paasisaqarfiusimagunarpoq, politiillu ullup-qeqqata siornatigut pasisaq 18-inik ukiulik tigusarisinnaasimavaat, taannalu angummik 42-nik ukiulimmik toqutsisimasutut pasineqarluni ulloq taanna inatsisit tunngaviusut naapertorlugit killisiuinermi sassartinneqarsimalluni.

Politiit tusagassiuutitigut nalunaarummi paasissutissiipput, angutit taakkua marluk ilaqutariittut.

Toqutsinermit nakuusernermut

Tasiilami Sermersuup Eqqartuussisoqarfiani eqqartuussineq sisamanngornermi aallartissaaq.

Unnerluussisussaatitaasut qaammatit sisamat ingerlaneranni unnerluussut allanngortissimavaat, taamaalillunilu 18-inik ukiulik toqutsisimasutut unnerluutigineqarunnaarluni, kisiannili toqumik kingunilimmik nakuusersimasutut unnerluutigineqalerluni. Unnerluussut angut unnerluussummi pisuutinneqassappat pineqaatissiissutaasinnaasumut pingaaruteqarpoq.

Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq:

AG Uge 19 2022

Klik her for at læse