Sermersuup unioqqutsitsilluni taarsigassarsiffiusimasinnaasut ininillu attartortitsinerit misissorpai
Taarsigassarsiat arlallit Kommuneqarfik Sermersuup ingerlatseqatigiiffinnut namminersortunut ineqarneq pillugu suliamut atatillugu taarsigassarsiaritissimasaat, aqutsisoqarfimmik kukkunersiuinerup inatsimmut naapertuunnersut siornatigut apeqqusernikuuai. Taarsigassarsititsinerit unioqqutitsinnginnersut paasiniarlugit suli misissorpai, aamma kommunip Iserit peqatigalugu ininik attartortut akiliutaasa annertussusaat misissorpai.
Pisortanit taarsigassarsiat 131 millionit koruunit unioqqutitsinerunnginnersut Kommuneqarfik Sermersup suli paasiniarpaa.
Tamatuma saniatigut kommunip Iserit suleqatigalugu kommunip inissiaataanni attartortut eqqortumik inigisamut akiliuteqartarnersut qulakkeerniarlugit misissorpaat.
Attartortut arfineq-pingasut suliami kommunimik aamma kommunip inissiaatileqatigiiffianik Iserit-mik politiinut tunniussinerannut atatillugu atorfilittaq Sermitsiaq.AG-mut taama ilisimatitsivoq.
Inissiaqarfinni marlunni attartortinneqartuni inigisamut akiliutinik kommuni 15-nit 20 procentinut appartitsinialerneranik nalunaarutiginninneq kinguneqarpoq, akiliutigineqartartoq qaffasippallaarsimammat. Kommunip ukiuni arlalinni akiliutip annertussusaanik attassiniareertorlu tamanna pivoq.
Suli inerniliisoqanngitsoq
Attartortut allat aamma inigisamut akiliivallaartarnersut kommunip maanna misissuleruttorpaa.
Attartortulli politiinut nalunaarutiginnittut inigisamut akiliutip aalajangerneqarnera naammagiinnanngilaat. Aamma Kommuneqarfik Sermersuup ingerlatseqatigiiffimmut inissianik sanaartortitsisunut kommunimut attartortitsisunut inigisamut akiliuteqarnissamut pisussaaffeqalersimanera tupigusuutigaat.
Tassani kommunimit pisortanit taarsigassarsiat pineqarput. Taarsigassarsiat inatsisinik unioqqutitsilluni tunniunneqarsimasinnaasut, aqutsisoqarfimmik kukkunersiuinermit upernaakkut 2022-mi oqaatigineqarpoq.
Sanaartortunut pisortanit taarsigassarsititsisoqarpat, inigisamut akiliuteqartarnermi inatsisit aalajangersimasut malinneqartussaanerannik tamanna pissuteqarpoq. Inatsisit malinneqanngippata kommunip taarsigassarsiat tigujumasinnaavai.
Aqutsisoqarfimmik kukkunersiuineq siorna marsimi saqqummerpoq, kommunilli maanna taarsigassarsiat inatsimmut naapertuunnersut misissorpai, tamanna oqaatigineqarpoq:
Oqaaseqartartoq: Politiinut nalunaarutiginninneq attapparput
- Taamatut pisoqarsimanersoq kommunip nalilissavaa, kisianni suli inerniliisoqanngilaq, Olafur Nielsen, kommunimi Pilersaarusiornermut Misissueqqissaarnermullu Immikkoortortaqarfimmi pisortaq Sermitsiaq.AG-mut akissuteqarluni allappoq.
Naak kommunip maanna akiliutip appartinneqarnissaanik neriorsuereeraluartoq, attartortut politiinut nalunaarutiginninnerminnik attassillutik, attartortunit oqaaseqartartoq, kinaassutsiminik isertuusserusuttoq taama oqarpoq. Ilaatigut pisortanut taarsigassarsiat misissorneqartariaqarnerannut innersuussipput:
- Inuussutissarsiortunut attartortitsinermut isumaqatigiissutit attartortitsinermut peqqussutinik naapertuinersut suli inerniliiffigineqarsinnaanngippata, kommunip attartortitsinini unioqqutitsinnginnersoq uppernarsarsinnaanngilaa, imaluunniit pisortanit taarsigassarsiat inatsisit malillugit tunniunneqarsimanersut, oqaaseqartartoq oqarpoq.
Nakkutilliisunit suliaq ingerlaqqippoq
Kommunit Nakkutilliisoqarfiata 2021-mi ukiakkut aalajangiinermini Kommuneqarfik Sermersuup ingerlatseqatigiiffinnut namminersortunut attartoriarlutik innuttaasunut attartortitsisarnerat isornartorsiorpaa. Aalajangiinermi pisortanit taarsigassarsiat inatsisinik naapertuinersut Ineqarnermut, Attaveqarnermut Naligiissitaanermullu Naalakkersuisoqarfiup nalilissagaa, Kommunit Nakkutilliisoqarfiata inassuteqaatigaa.
Naalakkersuisoqarfik siorna novembarimi suliami paasissutissanik noqqaassuteqartoq, aammalu naalakkersuisoqarfik taarsigassarsiat pillugit suli aalajangiisimanngitsoq, allagaatinik takunnissinnaatitaaneq malillugu paasissutissat pissarsiarineqartut takutippaat.