Skip to main content

Sermersuup missingersuutai nunaqarfinni ineriartortitsipput

2016-imut kommunip missingersuutai inoqarfinni mikinerpaani aningaasaliinernik arlalippassuarnik imaqarput

Kommuneqarfik Sermersuup kommunalbestyrelsiata missingersuummik marlunngornermi akuersinnerannut nunaqarfiini innuttaasunut nutaarsiassatsialaqartoq, kommuuni ilisimatitsivoq.

Missingersuutip ilaattut nunaqarfinni ineriartortitsinissamik siunertanut aningaasanik immikkoortitsisoqarpoq, taakkua misissuinermut atorneqassapput paasiniarneqassammat qanoq iliorluni nunaqarfiit pitsaanerpaamik innuttaasunut iluaqutaasumik ineriartortinneqarsinnaanersut.

Millionit arlallit
Paasiniaanermut atugassatut 1 millionit koruunit 2016-imi atugassatut illuartinneqarput aamma 2017-imi 2018-imilu ukiut tamaasa 5 millionit koruunit atugassiissutigineqarlutik, naak paasiniaalluni suliaq taanna ingerlagaluartoq imaanngilaq suliat allat unitsinneqartut, kommuuni erseqqissaavoq.

Kommunimi nunaqarfimmi siulersuisut siulittaasui sisamaasut missingersuutit pillugit Nuummi isumasioqatigiissitsisoqarnerani missingersuutit siullermeerneqarneranni peqataapput. Taakkua sanaartugassatut aningaasaliissutissanik arlalinnik kissaateqarput. 

Kissaatit arlalippassuit piviusunngortinneqarnissaat anguniarlugit Kommunalbestyrelse aningaasanik nassaarpoq.  

Iluarsartuussineq
Isortoq ilinniartitsisunik pissarsinissamik ajornartorsiuteqarpoq maannamut ilinniartitsisup illua ima ajortigimmat ilinniartitsisunit najorumaneqarani, taamaattumik missingersuutinit million koruunit affaanik illuartitsisoqarpoq illup sukumiisumik iluarsartuunneqarnissaanut atugassanik.

Kulusummi ukiualuit matuma siorna arsaattarfimmik amigaataalerpoq, arsaattarfimmik pioreersumik atuinissaq inerteqqutigineqalermat. Arsaattarfik imeqarfimmut qanippallaarmat.

Timersorfik tamatigoortoq
Taamanerniilli nunaqarfimmi inuusuttut katersortarfimmi sungiusartariaqartarsimapput - tamannalu maannakkut aamma ajornarsisimavoq. Taamaattumik timersorfiusinnaasumik tamatigoortumik sanaartornissamut 2 millionit koruunit missingersuutinit atugassiissutigineqarput taamaaliornikkut Kulusummi innuttaasut aalaqatigiinnissamut periarfissaqaqqilissallutik.

Kulusummi Illu Sullivik aamma nutarterneqassaaq. Nutarterinissamut 1,5 millionit koruunit atorneqassapput.

Arsaaffimmik nutarterineq
Kuummiuni arsaattarfik aggustip aallaqqaataani 1974 atoqqaarfissiorneqarpoq - maanna piffissanngorpoq tassannga nutarterissalluni alliliissallunilu, taamaattumik suliassamut tassunga 1 millionit koruunit aningaasaliissutigineqarput.

- Taakkunannga aningaasaliiffigineqartut amerlaqisut sivisuumik aningaasaliiffigineqarnissamik utaqqisimapput taamaattumik Kommunalbestyrelsip isumaqatigiittup maannakkut akuersissutigimmagit nuanneqaaq, Mille Søvndahl Pedersen, Sanarfinermut Avatangiisinullu Ataatsimiititap siulittaasua tusagassiorfinnut nalunaarummi oqarpoq.

Ataatsimut suliniutissat
Ullumikkut nunaqarfinni sanaartorneq marloriaat sinnerlugu akisuneruvoq. Tassunga nassuiaatissat ilagaat nunaqarfinnut maskinanik sulisussanillu assartuussinermi aningaasartuutigineqartartut.

Taamaattumik Kommuneqarfik Sermersuumi siunissami nunaqarfinni suliniutit ataatsimut katersorneqartassapput taamaaliornikkut aningaasanik pitsaanerpaamik atorluaanissaq siunertaavoq. 

Tamatuma kinguneranik aappaagu Qeqertarsuatsiaani sanaartugassat angisuut pingasut ingerlanneqassapput, tassaallutik timersortarfeeraq nutaaq, garage nutaaq aamma kommunip immikkoortortaanik annertuumik nutarterineq.  

- Kommunalbestyrelsimi aalajangiupparput suliassat ataatsimut katersornerannik suliniut Qeqertarsuatsiaani siullermeertumik ingerlatsissalluta, pissutigalugu True North Gemsip rubinisiorfia ineriartornissamik aningaasarsiornissamillu pitsaasunik periarfissiimmat. Ineriartorneq taanna tapersersorumavarput, Mille Søvndahl Pedersen oqarpoq. 

Atuaruk: Sermersuup missingersuutit akerliusoqarani akuerai

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER