Sermersuup killiffimmik nalunaarusiaa: - Pingaarutilinni tamani siuariartoqarpoq

Meeqqanut, Inuusuttunut Ilaqutariinnullu 2017-imiit 2020-mut Ineriartortitsinissamut pilersaarummi siunertat ilaattut Meeqqanut Ilaqutariinnullu Ingerlatsiviup suliani pillugit qaammatit pingasukkaartumik ataasiarluni Kommunalbestyrelsimut nalunaarutigisartussaavai.

Killiffik pillugu kvartalit sisamaanni nalunaarusiap siuariartoqartoq takutippaa, kisianni aamma pitsanngoriartoqarnissaanut inissaqartoq.

Nukittorsaanissaq pisariaqartinneqartoq
- Ulluinnarnili sulianut tunngasunik aqutseriaatsip pitsanngorsaaffigineqarnissaa pisariaqartinneqarpoq, soorlu sulisunik atorluaanerulernissaq isumalluarnartinneqartoq, kommunip tusagassiuutinut nalunaarutaani tamanna oqaatigineqarpoq.

Kommuneqarfik Sermersuumi ineriartortitsinermut pisortaq, Helene Horsbrugh, aaqqissuussaanerup allanngortinneqarneranut atatillugu Meeqqanut Ilaqutariinnullu Immikkoortortaqarfimmi aqutsisutut atorfeqarnermi suliassat nutarterneqartut ilisimatitsivoq.

- Siunertaavoq ulluinnarni sulianut tunnganerusunik aqutsisarnissap qulakkeerneqarnissaa. Tassa sulisunik ikorfartuisarnissaq ilitsersuisarnissarlu aamma nakkutilliisarnissaq nakkutiginnittarnissarlu ukkatarineqarnerussapput. Aqutsisutut atorfiit inuttassarsiuuteqqinneqassapput sapinngisamillu piaarnerpaamik inuttalerneqassallutik, ineriartortitsinermut pisortaq oqarpoq.

Immikkut ilisimasaqarfinngortitsineq
Aaqqissuussaanermik allannguinermi aamma sullissisut ataasiakkaat suliaqartarnerat immikkut ilisimasaqarfinngortinneqarpoq.

- Tassa siunissami ajornannginnerulersinneqassaaq ulluinnarni piginnaasanik suliaasartunillu qaffassaasarnissaq. Taamaalilluni sulisut piffissaq sulinermut atortagaat sunniuteqarnerusumik atorneqarsinnaalissaaq, Helene Horsbrugh taama oqarpoq.

Paasissutissarpassuarnit pissarsiarineqarsimasunit kisitsisitigut paasissutissat katersorneqarsimasut kommuni erseqqissaavoq, taakkununnga ilanngullugit ingerlatsivinni tamani sulisunit aqutsisunillu paasissutissat, kommunit ingerlatsiviisa immikkoortortaannit allanit paasissutissat, oqartussaasoqarfinnit ass. Namminersorlutik Oqartussanit politiinit kiisalu innuttaasunit allanit paasissutissat.

Kiffartuussisarneq misissorluarneqareermat ilaatigut inassutigineqarpoq angusassat sunniutissallu qitiutillugit politikkikkut aqutsisarneq inerisarneqassasoq.

Immikkoortut marluk
Immikkoortortaqarfiit marluk siunissami atuutsinneqalissasut Kommuneqarfik Sermersooq ilisimatitsivoq

• Innersuussisoqatigiit aamma Oqartussaaffeqarfiup Immikkoortortaa, immikkoortortaqarfiit taakku marluusut kommunimut tamarmut atuutissapput.
• Malinnaatitat peqqinnissaqarfimmit, isumaginninnermut aqutsisoqarfimmit, meeqqat illersuisoqarfiannit, politiinit kiisalu Ilisimatusarfimmit inuttaqartussat pilersinneqarsimapput.

Killiffik pillugu nalunaarusiaq tamaat uani takuuk