Sermersooq

Sermersuup 2017-imi annertuumik sanaartornissaq siunniuppaa

Kommuni sanaartornermut suliassanut milliardit kuartiinik immikkoortitsivoq

Aningaasaliissutit sanaartornernut nutaanut ingerlareersunullu immikkoortinneqarput

Kommuneqarfik Sermersuumi kommunalbestyrelsip 2017-imut missingersuusiani marlunngorneq novembarip ulluisa 15-ianni akuersissutigai.

Missingersuutit 20 millionit koruuningajannik sinneqartoorfiussapput. Peqataanik sanaartornermut suliassanut 240 millionit koruunit immikkoortinneqarput.

Missingersuutit siunnerfeqarluartut
- Missingersuutit siunnerfeqarluarput, taamaattorli pitsaasumik ineriartorneq kommunimit maanna atugarineqalersoq ikorfartussagutsigu pisariaqarput. Inissiat, meeqqeriviit pisariaqartikkatsigit sanaartornerillu suliffinnik pilersitsisarmata sanaartugassarpassuarnik qulakkeerinissaq kommunalbestyrelsimit isumaqatigiissutigineqarpoq, Kommuneqarfik Sermersuumi borgmesteri, Asii Chemnitz Narup (IA) oqarpoq.

Inuusuttunut kulturikkut illorsuit
2017-imi sanaartornermut aningaasat immikkoortinneqartut amerlasuut pilersaarutinut aallartereersunut tutsinneqassapput, assersuutigalugu Nuummi umiarsualiviup nutaap tungaanut aqqusineq aammalu Nuummi Tasiilamilu inissialiornernut, pilersaarutilli nutaat aamma inissaqartinneqalerlutik.

Aammattaaq Nuummi Tasiilamilu 2017-imi inuusuttunut kulturikkut illorsuarnik pisaartoqassaaq.

Meeqqat atuarfiat
Ingerlatsinermut suliassaqarfimmi suliassat nutaat arlallit aallartinneqarnissaannut inissaqartitsisoqalerpoq. Ilaatigut meeqqat atuarfianni inerisaanissamut aningaasaliissuteqalissaaq, aammalu paaqqinnittarfeqarnikkut pingaarnersiuineq pissaaq, taamaalillutik innuttaasut innarluutillit ullumikkut kommunip avataanut inissinneqarsimasut angerlarnissaminnut periarfissaqarniassammata.

Atuaruk: Sermersooq innarluutilinnut inissianik pisivoq

Periusissaq
Illoqarfiit pingaarnersaat pillugu periusissaq 2016-imi kommunalbestyrelsimit akuersissutigineqarpoq, taannalu naapertorlugu Nuummi inuttut aningaasaqarnikkullu inerisaanissaq qitiutinneqarput, aammalu kommunip nunaqarfiini tamani ineriartortitsinissamut periarfissanut sammisumik nunaqarfiit pillugit immikkoortumut pilersaarut suliarineqarluni.

Pilersaarutit marluusut tamarmik missingersuutinut tunngaviliipput, taakkulu isumaqatigiinnikkut akuersissutigineqarlutik.

Ineriartorneq
Kommuneqarfik Sermersuumi aningaasatigut pitsaasumik ingeriartorneq 2017-imi ingerlaannarnissaa kommunalbestyrelsimit naatsorsuutigineqarpoq.

Pitsaasumilli aningaasatigut ineriartorneq ersarissumik takuneqarsinnaasoq Nuumminngaaneersuusoq.

- Nuummi inerisaasoqarnerata kingorna Nuup avataani suliassat suliarisinnaalernerinik kinguneqarpoq. Tasiilami ajornartorsiutit arlaqartut iluarsiiviginissaat piviusunngorsimanavianngikkaluarput Nuummi suliniutit arlallit aallartitavut amerlisimanngikkaluarpata. Tamassuma takutiinnarpaa, Nuummi pitsaasumik ingerlasoqartillugu kommune aammalu nuna tamakkerlugu iluaqutaasartoq, borgmesteri ilanngullugu oqarpoq.

Powered by Labrador CMS