Sermersuumi pisortaq naalakkersuisoqarfimmi pisortanngussaaq
Kommuneqarfik Sermersuumi Suliffeqarnermut Isumaginninnermullu Ingerlatsivimmi pisortaq, Isak Nielsen Kleist, atorfimminit soraarpoq. Inuussutissarsiornermut, Nukissiuteqarnermut, Ilisimatusarnermut Suliffeqarnermullu Naalakkersuisoqarfimmi pisortanngussaaq.
- Iisaap ukiuni kingullerni marlunni kommunimi sulinermini tunniussaanut assut qujarusuppunga, suliffittaaminilu iluatsitsilluarnissaanik iluanaarnissaanillu kissaallugu, kommunaldirektøri Lars Møller-Sørensen kommunip nittartagaani taama oqarpoq
Isak Nielsen Kleist aprilip 30-ani naggataamik sulissaaq. Stabchefiugallartoq Jill S. Hellesen atorfimmut inissikkallarneqassaaq.
Jørn Skov Nielsen paarlassavaa
Jørn Skov Nielsen siorna augustimi nalunaarmat ukioq manna upernaakkut 60-inik ukioqarluni soraarninngussalluni, Naalakkersuisoqarfimmi pisortatut atorfik inuttassarsiuunneqalerpoq.
Taamaasilluni Namminersorlutik Oqartussani atorfilittat pingaarnerpaamik inissisimasut ilaat soraartussanngorpoq, Jørn Skov Nielsenilu aatsitassarsiornerup iluani suliani sunniuteqangaatsiarsimavoq.
2011-imi inuussutissarsiornermut suliffeqarnermullu naalakkersuisoqarfimmi pisortaangallartunngortinneqarpoq, ukiullu tulliani pisortatut atorfinitsinneqarluni. Taamaasilluni aatsitassarsiorneq aamma akisussaaffigilerpaa. Aatsitassanut pisortaqarfimmi pisortatut inissisimareersimavoq.
Kalaallit Nunaanni aatsitassat akisussaaffigineqalermalli suliat arlallit ukiuni arlalinni oqallisaangaatsiartarsimasut qanimut peqataaffigisarsimavai.