Sermersuumi meeqqat 200-t sinnillit utaqqisuutigineqartut
Paaqqinnittarfik nutaat meeraaqqerivittuunerusoq atuutissaaq, Nuummi meeraaqqerivinni inissanut meeqqat 165-it utaqqisuutigineqarmata.
Kommuneqarfik Sermersuumi meeqqat 230-t paaqqinnittarfinni imaluunniit atuareernerup kingorna ornittakkani inissanut septembarip qiteqqunnerani utaqqisuutigineqarput. Taakkunannga 211-t Nuummi paaqqinnittarfinni inissat piumaneqartorujussuuffigisaanni utaqqisuutigineqarput.
Tamanna kommunimi ingerlatsiviup naatsorsugaani Meeqqanut Atuarfinnullu kommunip ataatsimiititaliaani politikerinut suliarineqarsimasumi takutinneqarpoq. Ingerlatsivimmit ilaatigut Nuummut nutserartoqarnera utaqqisorpassuaqarneranut pissutaaqataanerarneqarpoq.
Illoqarfiit pingaarnersaanni utaqqisorpassuaqarnera pissutigalugu ingerlatsivik siunnersuuteqarpoq, paaqqinnittarfimmik nutaarluinnarmik, naluttarfiup Maliup eqqaani maannakkorpiaq sananeqartumik, aaqqissuussineq allanngortinneqassasoq.
Paaqqinnittarfiup februaarip 1-ani 2022-mi ammarnissaa naatsorsuutigineqarpoq, tassanilu pingasunik meeraaqqerivimmiunut initaqarnissaa meeqqerivimmiunullu pingasunik initaqarnissaa pilersaarutaalluni. Ingerlatsivimmit siunnersuutigineqarpoq, meeraaqqerivimmiunut init tallimanngortillugit meeqqerivimmiunulu ini ataasiinnanngortillugu allanngortitsisoqassasoq.
Utaqqisut allattorsimaffiat meeqqanik 60-inik ikilisinneqarsinnaasoq
- Taamaaliortoqassaaq utaqqisut allattorsimaffiat sapinngisamik annikillisarniarlugu. Meeraaqqerivimmi init tamarmik immikkut meeqqanik aqqaneq-marlunnut inissaqarput, tamannalu isumaqassalluni, utaqqisut allattorsimaffiata meeqqanik 5 x 12-inik (meeraaqqerivimmiunik 60-inik) ikilisinneqarnerannik, ingerlatsivik politikerinut allappoq.
Meeraaqqerivinnimi inissanut meeqqat 165-it utaqqisuutigineqarput meeqqerivinnilu inissanut meeqqat taamaallaat 22-t utaqqisuutigineqarlutik.
Meeraaqqerivimmi init immikkut pilersinneqartut marluk ingerlaavartumik meeqqerivimmi ininut allanngorteqqikkiartuaarneqarumaarput, taamaalillunilu ulluunerani paaqqinnittarfik eqqarsaatigineqaqqaarsimasutut aaqqissuunneqarsinnaalerumaarluni.
Taamaaliortoqassaaq meeqqat meeraaqqerivimmiut alliartornerat ilutigalugu, taamaalillunilu meeraaqqerivimmi inimit meeqqerivimmi inimut ikaarsaariartuaartoqarsinnaassalluni, ingerlatsivimmit oqaatigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
