Sermersuumi isumaqatiginninniarnerit suli ingerlapput
Illoqarfiit pingaarnersaata kommuniani kommunalbestyrelsemi issialersussat ukiuni sisamani tullerni suleqatigiinnissamut isumaqatiginninniarnerat suli ingerlavoq. Partiit pingasut oqaloqatigiinnerit pitsaasumit taavaat.
Kommuneqarfik Sermersuumi ukiuni sisamani tullerni suleqatigiinnissamut isumaqatigiinniarnerit suli ingerlapput.
Demokraatinit Justus Hansen oqaluttuarpoq isumaqatiginninniarnermik aqutsisunut, Inuit Ataqatigiinnut Charlotte Ludvigsenimullu attaveqarneq pitsaasuusoq, taamaatullu isumaqatiginninniarnerit akornutissaqanngitsumik ingerlasut.
- Isumaqatigiinniarnerit torersumik ingerlapput. Ukiuni kingullerni suleqatigiissimanitta nangeqqissinnaanissaa soorunami soqutigaarput, Justus Hansen (D) Sermitsiaq.AG-mut oqarpoq.
Partii kommunimut maanna marlunnik qinigaatitaqarpoq, tassa 2017-imi qinersinermut sanilliullugu ilaasortaatitaminik ataatsimik ikileriartoorluni.
Oqaloqatigiinnerit pitsaasut
Naleqqamit Pele Broberg Sermitsiaq.AG-mut ilisimatitsivoq Inuit Ataqatigiinnut oqaloqatigiinnerit pitsaasumik ingerlasutut nalilerlugit taamatullu Naleraq peqquneqarnermisut kissaatiminik tunniussisimasoq.
- Oqaloqatigiinnerit torersumik suli ingerlaqqissasut naatsorsuutigaara, oqarpoq.
Naleraq Kommuneqarfik Sermersuumi qinigaaffimmi kingullermi ilaasortaatitaqarsimanngilaq, maannali marlunnik isertitaqarluni. Taasisit Demokraatinit aamma Atassumit aaneqarsimasutut isikkoqarput, Demokraatimmi ilaasortaat ataatsimik ikinnerulerput, Atassullu ilaasortaatitaqarunnaavilluni.
Siumumit Martha Abelsen assingusumik nalunaaruteqarpoq.
- Oqaloqatigiinnerit aporfeqanngitsumik ingerlapput, aamma naatsorsuutigaara ualimut oqaloqatigeeqqilerutta tigussaanerusunik oqaloqatigiissuteqarnissarput, Sermitsiaq.AG-mut oqarpoq.
Sermitsiaq.AG-p Inuit Ataqatigiinniit Charlotte Ludvigsen oqaaseqartinniarsimagaluarpaa, isumaqatiginninniarnerilli ingerlaneranni oqaaseqassanani taanna ilisimatitsivoq.