Sermersuumi inuusuttut 19-it paaqqinnittarfiup avataani inooqqilernissaminnut sungiusartut

Inuusuttut angerlarsimaffiup avataanut inissinneqarsimasut inersimasutut nammineersinnaaleraangamik artorsarsinnaasarput. Atisanik errorsineq, nerisassiorneq aningaasaqarnerlu ilikkarneqarsimanngikkaangamik imaaliallagassaannaasanngillat.

Kommuneqarfik Sermersuumi maannakkorpiaq 19-inik inuusuttoqarpoq suliniuteqareernermi malitseqartinneqartunik, taakku kommunip inissiaataanni najugaqarput, nammineersinnaanerminnillu ilinniartinneqaraangamik ajornartorsiulernerminni ikiorserneqartartunik.

- Assersuutigalugu ataaseq ullaakkut makissinnaaneq ajorpoq, taamaammallu arlaleriarluni suliffimminik annaasaqartarluni. Sulisoq ataaseq ullumikkut ullaakkut arfineq-marluniit qulit tungaanut taassuma inaanukartarpoq, makinnissaa suliartornissaalu isumagiartorlugu, Kommuneqarfik Sermersuumi Innuusuttunut Sullissivimi pisortaq Cecilie Jerimiassen oqaluttuarpoq.

Ikaarsaariarneq oqimaatsoq

Taassuma tupaallaatigisimavaa, inuusuttut ulloq unnuarlu paaqqinnittarfimmiissimariarlutik nammineertussanngoraangamik inersimasutut inuunermik qanoq ilisimasakitsigisarnerat.

- Inuusuttorpassuit namminneq atisaminnik errorsisinnaanngillat, eqqiaasinnaanngillat aningaasaqarnerminnillu aqutsisinnaanatik. Paaqqinnittarfimmiinnerminni ikiorluarneqarpallaartarsimapput sunillu tamanik sullinneqartarsimallutik. Nammineertussanngoraangamik ikaarsaariarneq taakkununnga sakkortusarsimaqaaq, sullissivimmi pisortaq oqarpoq.

Kommunip taamaammat ikaarsaariarneq sapinngisamik ajornaallisinniarsarivaa.

-Paaqqinnittarfiit ilaannik suleqateqarluarpugut, inuusuttut assersuutigalugu paaqqinnittarfigisimasaminnut ilaatigut neriartorsinnaapput.

Cecilie Jerimiassenip oqaluttuaraa, paaqqinnittarfiit inuusuttunut angerlarsimaffiullutillu angajoqqaatut atuussimasut, aamma inuunermi ilumoortumi meeqqat 18-inik ukioqaleraangata inuulluaqqullugillu qutsavigineqaannarneq ajorput. Taamaammat inuusuttut nammineertussanngoraangata attavigeqartuartarnerat ajunngivippoq.

Arfiniliugaangata sisamat ingerlaqqittartut

Innuussutunut sullissivik suliniuteqareernermi malitseqartitsisartunik sisamanik sulisoqarpoq, sulisullu marlunnik ilaqqinneqarnissaannut akuerineqarsimallutik. Suliniuteqareernermi malitseqartitsisarneq 2019-ip aallartinneqarni aallartinneqarpoq, maannamullu inuusuttut arfinillit tamanna aqqusaarsimavaat. Immikkoortortaqarfik inuusuttunut atornerluisuusunut sullissivimi sulisunik marlunnik suleqateqarluarpoq.

Inuusuttut taakku inuusuttunut inissiani sinittarfeqanngitsuni, igaffeqarlutillu perusuersartarfilinni najugaqarput. Immikkoortortaqarfik aamma paaqqinnittarfiup avataani inooqqilernissaminnut sungiusartunut juulip qaammataani illuaraateqalissaaq, inuusuttut suiaassusaat malillugit inuusuttunut pingasunut inissalinnik.

Inuusuttut 23-nik ukioqalernissamik tungaanut sungiusartinneqarsinnaapput, ingerlalluarpatalu tamann sioqqullugu nammineertinneqalersinnaallutik. Inuusuttut taamaalillutik Isumaginnittoqarfik aqqutigalugu inissamik tunineqassapput, tassa illoqarfiit pingaarnersaanni inissarsiornermut ajornarluinnangajattumut akuutinneqaratik.

Inuusuttunit taakkunannga arfiniliusunit, paaqqinnittarfiup avataani inooqqilernissamut sungiusarsimasunit sisamat ilinniagaqarlutik suliffeqalerlutillu ingerlaqqissimapput, marlulli arlaannik atornerluisunngorsimallutik. Taakku inersimasunik isumaginnittoqarfimmut ingerlateqqinneqarsimapput.

Kommuni inuusuttunik suliniuteqareernermi malitseqartinneqartussanik manna tikillugu suli itigartitsisimanngilaq.

Powered by Labrador CMS