Sermersuumi innuttaasut siunnersuutaat pingasut tiguneqarsimapput

Kommuneqarfik Sermersuup innuttaasunut nittartagaani innuttaasut namminneerlutik pitsanngorsartikkusutaminnik siunnersuuteqarsinnaanerat qaammat aappaa avillugu atuutereersimavoq.

Innuttaasut siunnersuutaat pingasut innuttaasunit allanit ilalerneqarlutik taaneqarluarpata politikkikkut aalajangiiffigineqartussapput. Pingasullu siunnersuutigineqareersimapput.

Innuttaasut siunnersuutaat ikkunneqarnerminnit ullut 90-it ingerlaneranni innuttaasunit 250-init ilalerneqarlutik taaneqarsimasariaqarput, politikkikkut ataatsimiititaliani suliassanngortinneqassappata. Siunnersuutillu taakku suli 250-init taaneqarsimanngillat.

Siunnersuutit ukuupput:

• Quassussuaq kaajallallugu sikkilerfik – 180-init taaneqarsimavoq
• Nuussuarmi atuartut pisuffissaat uloriananngitsoq – 11-nit taaneqarsimavoq
• Nuummi angiartartunut atuarfik – 41-nit taaneqarsimavoq

Innuttaasut peqataatinneqarnerunissaat

Kommuneqarfik Sermersuumi innuttaasut peqataatinnerujumallugit taama suliniuteqartoqarpoq. Innuttaasut siunnersuusiorsinnaanerat Danmarkimi aamma atorpoq. Danmarkimi innuttaasut siunnersuutaat 50.000-init ikinnerunngitsunit ilalerneqarsimappata, folketingimi aalajangiiffigineqartussanngorlugit suliassanngortinneqartarput.

- Uannut pingaaruteqarpoq, pisariaqarfiini innuttaasut isumaannik tusarniaasarnissaq. Innuttaasut siunnersuuteqarsinnaalernerat isumaqarpunga, alloriarnerusoq annertooq, taamaalillunimi innuttaasut nammineerlutik iliuuseqarsinnaalerput, politikeriusugullu isumassarsiagut kisimik aalajangiiffigiinnarneqaratik, Kommuneqarfik Sermersuumi borgmester Charlotte Ludvigsen innuttaasut siunnersuuteqarsinnaanerat 17. marts atulersinneqarmat oqaaseqarpoq.

Kommuneqarfik Sermersuumi innuttaasut tamarmik innuttaasut nittartagaanni kommuneqarfiga.gl-imi siunnersuuteqarsinnaapput, soorlu aamma innuttaasut siunnersuutinik taasisinnaasut.

Innuttaasut nittartakkami aamma suliniutinut allanut sunniuteqaqataanissamut periarfissaqarput.