Angalanermut tapiissutit
Sermersuumi innuttaasut 54-it angalanermut tapiissuteqarfigineqarniartut
Ilaqutariit meerartallit innuttaasulli isertitakinnerit, siulersuit toqqaaniarnermi pingaartissimavaat
Upernaat tamaasa Kommuneqafik Sermersooq angalanermut tapiissuteqartarpoq. Ukioq mannalu Kommuneqarfik Sermersuumit aningaasat innuttaasunut angalanissamut tapiissutaasussat katillugit 716.000 koruuniupput.
Angalanissamut taperneqarnissaminnut 114-nit qinnuteqarsimapput, taakkunanilu innuttaasut 54-it ilaqutaallu angalanissamut tapiiffigineqassallutik.
- Aningaasaateqarfimmi siulersuisut sukannersumik immikkoortiterisariaqarsimapput, ilaqautariit meeartallit akissaatikittullu salliunneqarnissaat pingaartissimallugu aamma pingaartinneqarsimalluni, pineqartut ukiuni kingullerni tallimani angalanissaminnut periarfissinneqarsimannginneri, Kommuneqarfik nittartakkamini taama allappoq.
Toqqaaniarneq ajornakusoortoq
Siulersuisunit qinnuteqartut akornanni kikkunnik tapiinissaq ilaanni ajornakusoorsinnaasarpoq, aningaasaateqarfimmi siulittaasoq, Rasmine Geisler oqarpoq.
- Aningaasaateqarfiup tunngavia siunertaalu naapertorlugu, qinnuteqartut akornanni 54-it aningaasaliiffigaagut isumaqaratta taakkorpiaat angalanissaat pingaaruteqartuusoq iluaqutaasussaasorlu, taanna oqarpoq.
Kommuneqarfik Sermersuumi innuttaasut tamarmik angalanissamut tapiiffigineqarnissamut qinnuteqarsinnaapput.
Qinnuteqaatit arlallit kukkuneqartut
Ukioq manna qinnuteqartut amerlasuut ajoraluartumik qinnuteqarnerminni kukkusumik amingaateqartunillu qinnuteqaasiorsimapput, taakkulu ajoraluartumik agguaassinermi ilanngunneqaratik.
- Aappaagu qinnuteqaqqittoqarnissaanut innuttaasut kaammattussavagut, qinnuteqarnerminni sapinngisamik kukkuneqanngitsunik immersuinissaannik, tamannami anguneqarpat qinnuteqartut tamarmik assigiimmik pineqarnissaat anguneqassaaq. Ilaqutariit angalanissaminnik pisariaqartitsisut qinnuteqarnerminni kukkusunik immersuisimanerisa kinguneranik tapiiffigineqarsinnaanngimmata ajuusaarnarpoq, Rasmine Geisler oqarpoq.
Ilaqutariit imminnut ungasissumiittut ataqatigiinnerisa attatiinnarneqarnissaat siunertaralugu angalanermut aningaasaateqarfik tapiisarpoq. Taamatullu nunat allat aamma kulturit allaanerusut takuneqarnissaat siunertarineqarluni kommunini innuttaasut Kalaallit Nunaata iluani avataanilu anglanissaat periarfissinneqartarluni.