Sermersuumi inissiat pillugit politikkikkut aaqqiagiinngittoqaqqilersoq
Siumut Nuummit borgmesteri aamma Kommuneqarfik Sermersuumi allaffeqarfik Namminersorlutik Oqartussat inissiaataannik sukkavallaamik tigusiniartutut pasillerneqarput. Borgmester Charlotte Ludvigsen pasilliutinik ilumuunnginneraavoq, taakkualu ”ingasattutut” isumaqarfiginerarlugit.
Siumup immikkoortortaqarfia, siulittaasoq Inga Dora G. Markussen gruppillu siulittaasua Peter Davidsen siuttoralugit, marlunngornermi kommunalbestyrelsip ataatsimiinnissaa sioqqutitsiarlugu tusagassiuutitigut nalunaarummik saqqummiussaqarpoq, tassanilu apeqqutigineqarluni kommunimi aqutsineq atorfilittanit tiguneqarsimanersoq.
Kommunalbestyrelsip ukiut nikinneranni qaammatit aqqanillit qaangiuppata Namminersorlutik Oqartussat inissiaataannik 2.318-inik tigusinissamik suliamik oqaluuserinnittussaanera Siumumit pakatsissutigineqarpoq.
- Aalajangerneq qanoq kommunip innuttaanut kinguneqassanersoq iluamik qulaajarneqarsimanngilaq, ilami tamanna tamanulluunniit saqqummiunneqarsimanngilaq. Aalajangernissamut toqqammavissiaq amigartorujussuuvoq, taamaammallu Siumut Nuup kommunip aqutsinermini pissuserissaarnermik malinninnissaa kaammattuutigaa, tusagassiuutitigut nalunaarummi oqaatigineqarpoq.
Paasitinneqarluartumik tunngaveqarneq
Politikerit Siumumeersut uparuarpaat, ullormut allaat oqaluuserisassani atortussiani ”paasitinneqarluartumik tunngaveqarneq” naammassineqarsimanngitsoq, ilaatigut aningaasaqarnikkut isumalluutitigullu naliliinernik pigisaqartoqanngimmat aamma inatsisinik toqqammavinnik pappiaqqanillu sinaakkusiissutissanik soqanngimmat.
- Inissianik tunniussinermut atatillugu Namminersorlutik Oqartussat tunngavissiaat, suullu piumasaqaataanerat aamma kommunalbestyrelsimut saqqummiunneqanngilaq, erseqqissaatigineqarpoq.
- Sooruna piffissaq kingullerpaaq atorlugu kommunip aqutsisuisa qinikkat direktørillu immikkoortumik taamak annertutigisumik pinissaa sulissutigigaat? Taamatut aqutseriaaseqarneq akissutissiinani apeqqutinik amerlanernik qaffakkaatitsiinnarpoq. Tamakku ullumi kommunalbestyrelsip ataatsimiinnerani akineqarsinnaanngippata, Siumut Nuup sakkortunerpaamik ilaasortami itigartitsillutik taasinissaat innersuussutigiumavaa, allaffeqarfillu aalajangernissamik toqqammavissiamik apeqqutinik siuliani qaqilerneqartunik akissutinik imaqartunik saqqummiussinissaanik qinnuigiumavaa. Taamaaliortoqanngippammi atorfillit kommunimi aqutsineranik tigusinerat aatsaat taamak aarlerinartigilissaaq, taamaattoqarpallu oqartussaaqataaneq isumaarutissaaq, politikerit Siumumeersut taakkua marluk allapput.
Borgmesteri ilumuunnginneraavoq
Taamatut suaarutiginnittoqaraluartoq siunnersuut ataatsimiinnermi akuersissutigineqarpoq, kisianni borgmester Charlotte Ludvigsen erseqqissaavoq, isummerfigineqartoq tassaanngitsoq Namminersorlutik Oqartussat inissiaataannik tunniussinissaq, tassaallunili isumaqatigiinniarniarnissat piviusunngortinnissaannut aallartisarnissaq.
- Aningaasatigut naliliinertaqanngilaq pissutigalugu aalajangiineq aningaasatigut kinguneqartussaanngimmat. Namminersorlutik Oqartussanit neqeroorummik takkuttoqarpat tunniussinissamut tunngasut kommunalbestyrelsimut saqqummiunneqarumaarput, Charlotte Ludvigsen paasissutissiivoq, ilimaginerarlugulu Siumumit piaaraluni paatsoortoqarsimassasoq, suliap timitaa Siumumit isummerfigineqarani qineqqusaarlutilli pimmata.
- Siumukkut ippassaq aalajangerput tunniussinissaq pillugu piginnittuunermut periuseq itigartitsissutigissallugu. Amerlanerussuteqarsimasuugunik isumaqatigiinniarnissat aallartissimanavianngilagut aamma inissiat tunniunneqarnissaat isumatusaarnerusimassanersoq paasinngitsoorsimassangaluarparput. Taamatut isummerneq kikkunnut iluaqutaasorineraat naluara, borgmesteri IA-meersoq oqarpoq.
Borgmesterip eqqumiigaa, tunniussinissaq sooq taama sukkatigisumik ingerlanneqassasoq Siumumit eqqarsarnartoqartinneqarmat, tassami tunniussinissaq kommunit aaqqissuuteqqinneqarneriniilli 2008-miilli pilersaarusiorlugu aallartinneqarsimammat.
Atorfilittat akuliunneqarnissaat mianersoqqussutigigaa
Siumup tusagassiuutitigut nalunaarutaani atorfilittat akuliunneqarput suliamilu atuuffiat apeqquserneqarluni, tamannalu Charlotte Ludvigsenip mianersoqqussutigaa.
- Allaffeqarfik qineqqusaarutiginagu. Apriilip ulluisa arferngani qinerneqarsinnaasut akornaniinnavianngilaq. Uangali qinerneqarsinnaasut akornanniissaanga. Illersukkama ilagivaat atorfilittat politikkikkut aalajangeeqataaneq ajortut tusagassiorfitsigut pillagaasutut ittut ernumassuteqannginnissaat, Charlotte Ludvigsen oqarpoq, atorfilittallu kommunip aqunneqarneranik tigusisimanerat ilumuunnginnerarlugu.
- Qinigaaffiusoq tamakkilerpoq allaffeqarfik Siumumit saassutarineqarluni. Uanga nammineerlunga partiip politikkikkut iliuuseqarniarnera taamaallaat isigiinnarsinnaavara. Eqqarsarnartoqartissavara partiip nammineerluni atorfilittat tamavimmik qaquguluunniit qimaatissallugit iluatsikkaluarpatigit kommune qanoq aqussaneraat, Charlotte Ludvigsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...