Sermersuumi inissiat pillugit ikiorsiissoqangajalersoq

Kommuneqarfik Sermersuumi Borgmesteri Asii Chemnitz Narup aammalu Ineqarnermut Naalakkersuisoq Siverth K. Heilmann Kommunip ineqarnikkut inissisimanera pillugu ataasinngormat ataatsimeeqatigiipput.

Tusagassiutinut nalunaarummi oqaatigineqarpoq ataatsimeeqatigiinnerup malitsigisaanik isumaqatigiissutigineqartoq Nuummi inissiat 1980-ikkut ingerlaneranni sanaartorneqarsimasut ilaasa qaliaasa, igalaavisa aammalu silataatungaasa iluarsartuunneqarnissaat Namminersornerullutik Oqartussat tungaannit siuarsarneqassasut. Tamatumalu saniatigut inissiat tamatigoortut Nuummi Qinngutsinni sanaartorneqassasut. Isumaqatigiissutigineqartut taakku saniatigut isumaqatigiissutigineqarpoq, Paamiuni inissiarsuatoqarsuit qaqortut isaterneqartussat pillugit Namminersorlutik Oqartussat pilersaarusiorlutik aallartissasut.

Kiisalu isumaqatigiissutaavoq Namminersorlutik Oqartussat isumagissagaat Tasiilami inissiat affarleriiaat misileraalluni iluarsartuunneqarnerisa ingerlanneqarnissaat.

Inissiat pitsaanerusut akikinnerusullu
- Siunissaq eqqarsaatigalugu suleqatigiinneq pitsaasoq aallarteriigarput suli annerusumik inerisassallugu pisariaqarpoq, tamannalu pissaaq oqaloqatigiinnivut paaseqatigiiffiulluartut nanginnerisigut. Isumaqatigiissutaavoq Siunnerfilimmik suleqatigiinnissaq aammalu inissiat pitsaanerusut, akikinnerusut pilertornerusumik naammassineqarsinnaasut nunatsinni siunnerfigineqassasut isumaqatigiissutaavoq, naalakkersuisoq Siverth K. Heilmann oqarpoq.

Kommuneqarfik Sermersuumi borgmesterimit Asii Chemnitz Narup-imit naalakkersuisunit taama oqartoqarnera nuannaarutigineqarpoq:

- Kommuneqarfik Sermersuumi inissaqarniarneq inissialiortiternerlu suleqatigiissutigisinnaagatsigit nuannaarutissaavoq. Tamarmiulluta isumaqatigiissutigaarput Nunatsinni inissialiortiteriaaseq pitsaanerusoq akikinnerusorlu siuarsarneqassasoq, aamma Kommuneqarfik Sermersuumi.

Qinngorpumi inissiat 96-t nutaat
Borgmesterip Asii Chemnitz Narupip uppernarsarpaa Kommuneqarfik Sermersooq tapiliussamik kommunimut pilersaarummik suliaqassasoq, taamaalilluni Qinngorpumi inissianik 96-inik sanaartorneq 2014-imi aallartinneqareersinnaaniassammat.

Inissiat tamatigoortut taakku quleriiaajussapput aqqaneq marlukkaanik inissiartallit, inissiallu taakku assigiinngitsunik angissuseqassapput, inissiat pingasut marlunnik initaqassapput 50 m² missaannik angissuseqarlutik, inissiat arfinillit pingasunik initaqassapput 61 m² missannik angissuseqarlutik aammalu inissiat pingasut sisamanik initaqassapput 77 m² missaanni angissuseqassallutik.

Pilersaarutit malillugit aamma Qaqortumi, Sisimiuni Ilulissanilu inissianik taamaattunik kingusinnerusukkut sanaartortoqartussaavoq. Tamatumalu saniatigut Qaqrtumi, Narsami, Maniitsumi aammalu Sisimiuni inissiat isatigassat pilersaarusiorlutik aallartinneqarsimalereerput.

- Inissiat amerlinissaat, tamatumunngalu atatillugu sanaartornikkut suliallit suliassaqarnerulernissaat nuannaarutigisorujussuuarput, Asii Chemnitz Narup oqarpoq.