Sermersuumi imatut sanaartortoqassaaq

Kommuneqarfik Sermersooq kommunip illoqarfiini sisamaasuni; Nuummi, Paamiuni, Tasiilami Ittoqqortoormiinilu ineriartortitsinissamut pilersaarummik suliaqarsimavoq. Pilersaarut Aningaasaqarnermut Inuussutissarsiornermullu Ataatsimiititamit suliarineqarlunilu akuerineqarsimavoq.

Kommuni naapertorlugu pilersaarummi pingaarnertut Nuummi inissanik nutaanik pisariaqartitsineq salliutinneqarsimavoq, tamatumunngalu peqatigitillugu illoqarfinni allani inissianik nutarterillunilu isaterinissaq qulakkeerneqarniarluni.

Illoqarfiit pingaarnersaannut atatillugu kommunip 2030-mi Nuummi 30.000-inik najugaqartoqalernisssanik anguniagaqarnera politikkikkut aalajangiunneqarsimasoq eqqarsaatigisimavaa. Inissialiornissamulli pilersaarummi illoqarfiit pingaarnersaanni 25.000-it missaannik najugaqartoqassasoq tunngavigineqarsimavoq.

Kisitsisilli taakku marluk Naatsorsueqqissaartarfiup Nuummi innuttaasut amerlassuseqarnissaannik takorluuisimaneranit amerlanerupput. Naatsorsueqqissaartarfik naapertorlugu Kommuneqarfik Sermersooq 2030-mi 24.500-t missaannik inoqalertussaavoq.

Illoqarfiit pingaarnersaanni innuttaasunut nutaanut inissialiornissat saniatigut, kommunip pisortat inissiaatileqatigiiffiinni initaarnissamut utaqqisut allattorsimaffiat misissorsimavaa. Misissuisimanermi paasinqarpoq, Nuummi inissianik 700-t missaanniittunik pisariaqartitsisoqareersoq - kommunimit nalilerneqarpoq, 2030-p tungaanut Nuummi inissianik nutaanik 3.450-inik pisariaqartitsisoqassasoq.

60-ileereersimasut 80 procentinik amerlanerulersimasut

Kommunillu pilersaarusiornermini pisariaqartitata assigiinngilluinnartut eqqarsaatigisussaavai. Assersuutigalugu kommunip ilaqutariinnut ataatsinut illussat nunaminertani arlalinniinnissaat eqqarsaatigisimavaa. Tamatumunnga pissutaavoq illoqarfimmi inoqutigiit isertitaqarnerujartorneranni initaarusuttut amerliartornerat.

Naatsorsueqqissaartarfiup innuttaasut amerlassusissaat pillugu naatsorsuisimanera

Illoqarfiit pingaarnersaata kommuniani politikkikkut anguniagaavoq, 2030-mi Nuuk 30.000-inik inoqalissasoq. Naatsorsueqqissaartarfiup naliliinermini takorloorpaa, 2030-mi Kommuneqarfik Sermersuumi tamarmi 24.500-nik inoqalissasoq. Naatsorsueqqissaartarfimmit illoqarfiit immikkoortillugit naliliisoqarsimanngilaq.

Naatsorsueqqissaartarfiup Sermitsiaq.AG-mut ilisimatitsissutigaa, Kommuneqarfik Sermersuumi ukiut tallimat kingulliit ineriartorsimaneq tunngavigalugu innuttaasut amerlassusissaat naatsorsorneqarsimasoq.

Naatsorsueqqissaartarfik naapertorlugu, innuttaasut amerlassusissaannik missingiinerit ilaasa takutissimavaat, 2030-p tungaanut innuttaasut qanoq amerlatigilernissaannik naatsorsuisimanerit annikilliallassasut. Tamatumunnga pissutaavoq ukioqqortusisimasut ukiuni qulikkuutaani aggersuni toqukkut qimaguttussaanerat. Tamannalu innuttaasut amerlassusaannut annertuumik sunniuteqartussaavoq.

Naatsorsueqqissaartarfiup tamatuma saniatigut assersuutigalugu timmisartoqarfiliorneq, Nuummi suliaqarnerulersitsisinnaasoq innuttaasullu amerlassusaannut sunniuteqarsinnaasoq eqqarsaatigisimanngilaa. Tassa Naatsorsueqqissaartarfiup siumoortumik naatsorsuutigisaanit innuttaasut amerlanerulersinnaanerannut tamanna sunniuteqarsinnaavoq.

Kommunimit aamma kommunimut tamarmut atatillugu anguniarneqarpoq, sanaartukkat 20 procentii 'utoqqarnut naleqqussagaassasut'. Tamatumunnga pissutaavoq utoqqaat ukiuni aggersuni amerlanerulertussaanerat.

2011-miinnarmi Nuummi innuttaasut 60-ileereersimasut 1.306-iniit 2.355-inut amerlisimapput. Tassa 80 procentinik amerlanerulersimallutik.

Tasiilami innuttaasut amerlassusaat allanngussangatinneqanngitsoq

Illoqarfiit pingaarnersaanni utoqqaat illuini inissat aamma amerlineqassapput, tassanilu oqaatigineqarpoq, atuarfiup ASK-ip ullumikkut inissisimaffiani utoqqaat illuanik imaluunniit utoqqarnut inissianik sanaartortoqarluarsinnaasoq.

Grafikimi tulliuttumi takuneqarsinnaavoq, Kommuneqarfik Sermersuup Nuummut atatillugu inissialiornissamut pilersaarutaani pingaarnerit.

Tasiilami, Paamiuni Ittoqqortoormiinilu pingaarnertut suliarineqassapput, inissiat nungullarluinnarsimasut nutarsarneqarnissaat aamma inissiat angissutsimikkut pitsaassutsimikkullu ullutsinnut naleqqussarneqarnissaat.

Tasiilami innuttaasut amerlassusaat allanngussangatinneqanngilaq, maannakkorpiarlu inissanik 70-inik pisariaqartitsisoqartoq, kommuni illoqarfimmi sanaartorfigissaalluni suliaqartoq naliliivoq.

Paamiuni isaterisoqassasoq

Paamiuni ineriartorneq illoqarfiup innuttaasa amerlassusaannut ajortumik sunniuteqarsimavoq, innuttaasut 2011-miilli 21 procentimik ikinnerulersimapput:

- Kommunip Paamiunut atatillugu pilersaarusiornermini qulakkeerniarsimavaa, illoqarfiup najoruminartuujuarnissaa. Tassunga atatillugu Namminersorlutik Oqartussat inissiaataasa inissiarsuillu illoqarfiup qeqqaniittut aserfallalluinnarsimasut isaterneqarnissaat qitiutinneqarsimalluni, taakkulu ilarpassui maanna isaterneqareersimapput, kommuni pilersaarummini allappoq.

Ittoqqortoormiini innuttaasut ikiliartortut

Inissiat aserfallassimasut isaterneqarnissaanut atatillugu kommunip nalilersorniarpaa, inissiat isaterneqartut sumiiffiini inissianik nutaanik ullutsinnut naleqquttunik sanaartortoqarnera illoqarfimmut iluaqutaassanersoq.

- Inissiat taakku angissusaat assigiinngitsuussapput, inissialli mikinerit akikinnerillu illoqarfiup utoqqartaannut inuusunnerusortaannullu naleqquttuunissaat qitiutinneqassalluni, pilersaarummi allassimavoq.

IIttoqqortoormiini innuttaasut 2021-mi 361-iupput, tassa ukiut qulit kingulliit ingerlaneranni 23 procentimik ikileriarsimallutik. Nalilerneqarpoq, illoqarfimmi inissanik qulingiluanik pisariaqartitsisoqassasoq. Kommuni illoqarfimmut pilersaruteqartoqarneranut atatillugu allassimanngilaq, akerlianilli illoqarfimmi inissanik qanoq pisariaqartitsisoqartiginersoq nalileruminaatsinneqarsimavoq.

Pilersaarutit suliarineqarsimasut naggataatigut kommunalbestyrelsip tullissaanik ataatsimiinnerani akuersissutigineqassapput.