Sermersuumi borgmesteri: Inissiat kommunip aamma suliassarai
Kommuneqarfik Sermersuup innuttaasunut inissanik pissarsiniarluni periuserisaa pillugu eqqartussissuserisup misissuisimanermini isornartorsioraluaraa, borgmesteri isumaqarpoq kommuni taamaaliornissaminut pisinnaatitaasoq.
Attartornissamut isumaqatigiissut millionerpassuarnik nalilik aamma Nuummi innuttaasunut hunnorujulikkaanut ineqartitsilersussaq, Kommuneqarfik Sermersuup Namminersorlutillu Oqartussani Nunamut Namminermut immikkoortortaqarfiup kommuninik nakkutilliisartup saqitsaanneranni qitiuvoq.
- Isornartorsiuinerminni innuttaasunut inissianik pissarsinissaq kommunip suliassarinngikkaa oqaatigimmassuk paasisinnaanngilara. Innuttaasut inissaannik pissarsiniarluta sorsuuteqarnitsinni, Namminersorlutik Oqartussat aporfilersuinerat ajornartorsiutaavoq annertooq, Kommuneqarfik Sermersuumi borgmesteri Charlotte Ludvigsen (IA) oqarpoq.
Namminersorlutik Oqartussat Kammeradvokatip misissuisimanera tunngavigalugu Kommuneqarfik Sermersuumut peqqussutigaat, kommunip sanasut namminersortut inissiaataannik attartoriarluni innuttaasunut attartortitseqqittarnerminik unitsitsinissaa.
Namminersorlutik Oqartussat aamma kommunimi nakkutilliineq annertooq aallartissimavaat, tassani sulisut arlallit suliami allagaatinik misissuisussanngortinneqarsimapput.
Amigartooruteqarnermut isornartorsiuineq
Borgmesterimilli Namminersorlutik Oqartussat Kammeradvokatillu inerniliussaat paasiuminaatsinneqarput:
- Periuseq 2016-imili atorsimavarput, aamma politikkikkut oqaluuserineqarnikuuvoq, Charlotte Ludvigsen attartornissamik isumaqatigissuteqarneq kommunalbestyrelsemit akuerineqarsimasoq innersuussutigalugu oqarpoq.
Kammeradvokatip kommunip inissaqartitsiniarnerminut periuserisaanik misissuinermini isornartorsiorsimavaa kommunip sanasunik namminersortunik amigartoorutaasussamik isumaqatigiissuteqarsimanera.
Isumaqatigiissutit amigartooruteqartitsipput, pissutigalugu kommunip inissiat appasinnerusumik ineqarnermut akiliuteqartitsisarluni attartortimmagit, tassa kommuni sanasunut akiliutigisimasaanit appasinnerusunik. Kammeradvokati naliliivoq, kommuni taamaalilluni innuttaasut ilaannut tapiissuteqarsimasoq.
Borgmesteri: Nammineq inissiaatit annertunerusunik amigartoortitsisarput
Borgmesterilli aalajangiussimallugu oqaatigaa, kommuni inatsisit malillugit suliaqarsimasoq. Taassuma oqaatigaa, kommunimit naatsorsuisimanerit takutikkaat, inissiat kommunip nammineerluni sanatissimasai suli annertunerusunik amigartoortitsisartut, aamma Kammeradvokati inatsimmik paatsuisimassasoq.
Kommuni Eqqartuussissuserisunut Malling & Hansen Dammikkunnut ikioqqulluni, Kammeradvokatip inerniliisimaneranut oqaaseqaqqusisimavoq.
Eqqartuussissuserisut oqaaseqaamminni ilaatigut oqaatigisimavaat, attartortitsinermut inatsimmi ilaatigut allassimagaluartoq pisortat inissiaataannik attartornerup qanoq aalajangersarneqarsinnaanera, inatsit nalinginnaasumik atorneqarneq ajortoq:
Eqqartuussissuserisoq: Inerniliisimaneq kukkusumik inerniliisimanernit tunngaveqarpoq
- Taamatuttaaq qularnaateqanngilaq, inissiat tamarmik aserfallatsaaliorneqartussaappata ullutsinnullu naleqquttuunissaat qulakkeerneqassappata, attartornermut akiliutissaq pisortat inaataanni akileqquneqartartoq, pisortat inissianut pineqartunut aningaasartuutissaannut tamakkiisumik matussusiissutaasinnaanngilaq.
Eqqartuussissuserisut pingaarnertut inerniliuppaat, Kammeradvokati inerniliussaminut tunngavissaqanngitsoq, pissutigalugu Kammeradvokatip inerniliussaa kkukkusumik tunngaveqarluni pisimammat.