Sermersuumi borgmesteri isornartorsiuisoqareersorlu immikkut ittumik ataatsimiinnissamut aggersaavoq
Kommuneqarfik Sermersuumi Aningaasaqarnermut Inuussutissarsiornermullu Ataatsimiititaliaq, Aningaasaqarnermut Naalakkersuisoqarfiup isornartorsiuinera pillugu immikkut ittumik ataatsimiinnissamut aggersarneqarpoq. Politikerip illuatungiliuttup isornartorsiuineq tupaallaatiginngilaa.
Kommuneqarfik Sermersuup Aningaasaqarnermut Naalakkersuisoqarfiup isornartorsiuineranut tunngatillugu borgmesteri Avaaraq Olsen (IA) maanna nalunaaruteqarpoq.
Kommunip Naalakkersuisunit akuersissuteqaqqaarani attartortitsinermut isumaqatigiissusiornermigut missingersuusiortarnermut naatsorsuusiornarnermullu inatsit arlaleriarluni unioqqutissimagaa Naalakkersuisoqarfiup nakkutilliinermini paasivaa. Taamaattumik Naalakkersuisoqarfik kommunimut sakkortuumik isornartorsiuivoq.
Isornartorsiuineq tunuliaqutigalugu Avaaraq Olsen Aningaasaqarnermut Inuussutissarsiornermullu Ataatsimiititaliap ataasinngorpat immikkut ittumik ataatsimiinnissaanut aggersaavoq, isornartorsiuineq tassani oqaluuserineqassalluni.
Kommunalbestyrelsi peqataatinniaraa
Kommuni nittartakkamini taama ilisimatitsivoq, tassanilu borgmesteri ataatsimiinnissamut nammineq iliuuseqarsimasoq atuarneqarsinnaavoq.
Suliarlu pillugu naatsumik aamma oqaaseqarpoq:
- Kommuneqarfik Sermersuup tamatigut inatsisit malillugit sulisarnissaat piumasaqaatigaara saneqqutassaanngitsoq. Tamatumunnga peqatigitillugu suliatsinni, ajoraluartumik amerlavallaartuni kommunalbestyrelsip tamarmiusup akuutinneqarnissaa kissaatigaara, Avaaraq Olsen oqarpoq.
Borgmesteri suliaq pillugu tallimanngornermi oqaaseqarnissaminut periarfissaqanngitsoq, kommuni ilisimatitsivoq.
Illuatungiliuttoq tupaallanngilaq
Aningaasaqarnermut Inuussutissarsiornermullu Ataatsimiititaliami Siumumit ilaasortap, Inga Dora G. Markussenip, tassa kommunalbestyrelsimi illuatungiliuttoq, nutaamik isornartorsiuisoqarnera tupaallaatiginngilaa:
- Isornartorsiuisoqarnera tupaallaatiginngilara, kommunalbestyrelsimilu ilaasortat aalajangiinernut akisussaasuutinneqalersinnaasut aamma tupaallaatiginavianngilara.
- Siumut sulianut arlalinnut 2017-imili isornartorsiuivoq, tassani ikinnerussuteqarluta arlalinnik oqariartuuteqartarluta. Ajornartorsiuteqartoqartoq illuatungiliuttutut oqariartuutiginiartarsimavarput, kisianni borgmesteriusimasumit kommunimilu pisortamit itigartinneqartarpugut, Inga Dora G. Markussen oqarpoq.
'Piffissarujussuaq' atorsimagaat
Kommunalbestyrelsip maanna sulinerani qangali pisimasut initunerujussuat taassuma uggoraa:
- Suliat ingerlanneqarsimasut atuarnerannut torersaanermullu piffissarujussuaq atorparput, qineqqusaarutigisimasavullu aallartissinnaanagit. Ajornartorsiuterpassuatta aaqqiiviginissaannut suliniuteqarusuppugut, kisianni illuatungiliuttutut sippuilluta sulivugut, akisussaafferujussuarmillu tunineqarluta, taanna oqarpoq.
Aningaasaqarnermut Naalakkersuisoqarfimmit isornartorsiuineq pillugu suliaq ineqarneq pillugu suliap nanginneraa. Kommuninik Nakkutilliisut suliami naliliinerannut atatillugu, Aningaasaqarnermut Naalakkersuisoqarfik saniatigut kommuni missingersuusiortarnermut naatsorsuusiortarnermullu inatsimmik unioqqutitsisimanersoq nakkutiginnissasoq Nakkutilliisoqarfiup kaammattuutigaa.