folkeskole
Sermersuumi atuartut 1. klassimit tuluttut ilinniartinneqartalissasut
Aggustip qaammataani 2017-mi ukioq atuarfiusoq nutaaq aallartippat, Kommuneqarfik Sermersuup atuarfiini 1 klassini atuartut tamarmik tuluttut atuartinneqartalissapput.
I am. You are. He, she, it is.
Kommuneqarfik Sermersuup atuarfiini aggustip qaammataani ukioq atuarfiusoq nutaaq aallartippat 1. klassit taama oqaluttalissapput. Sermersuumimi 1. klassimi atuartut tamarmik tuluttut ilinniartinneqartalissapput.
Sermersoorsoq nittartakkamini taama paasissutissiivoq
Sapaatip akunneranut ataasiarlutik
Kommuneqarfik Sermersuumi Meeqqanut Atuarfinnullu ataatsimiititaliaata siulittaasua Nivi Olsenip, iluarisimaaqaluni ataatsimiititaliaq sinnerlugu nalunaarutigaa kommuneqarfimmi 1. klassit tamarmik tuluttut ilinniartinneqartalissasut.
- 1., 2., 3., klassenilu atuartut tuluttoortinneqartarneri sapaatit akunnerata ingerlanerani ataatsimik ilaneqassapput, Nivi Olsen oqarpoq nangillunilu:
- Tuluttut ilinniartitsisalernissat fagit allat ilanngarneqarnerannit kinguneqarnavialaq, taamaattumik angajoqqaat tamanna annilaanngatigissanngilaat. Ilinniartitsisunik 4. klassini tuluttut ilinniartitsisartunik illoqarfinni nunaqarfinnilu tamani peqareermat, ilinniartitsisalerneq immikkut aningaasartuutaassanngilaq.
Alloriarneq siulleq
Kommunimi atuartut pitsaanerusumik atuartinneqartarnissaannik kommunalbestyrelsimi partiit suleqatigiit anguniagaqartut, tuluttullu 1. klassimit ilinniartitsisalernissat anguniakkani piviusunngortitsinneqartut siulliit ilagaat.