Sermersuumi Atassut Siorarsiorfimmi sanaartornermik unitsitserusuppoq
Atassut Nuuk isumaqarpoq, Nuuk allilerneqartinnagu Kommuneqarfik Sermersuumi tamarmi atugarissaartuuneq sammineqarnerusariaqartoq.
Nuummi Siorarsiorfimmi sanaartornissaq maanna piffissaanngilaq, sanaartornerlu unitsikkallarneqartariaqarpoq.
Taamatut isumaqarpoq Atassut sinnerlugu Kommuneqarfik Sermersuumi kommunalbestyrelsimut qinigassanngortittoq Qulutannguaq Berthelsen.
- Siorarsiorfimmi sanaartorniarneq unitsikkusunneruarput, aningaasallu kommunimi tamarmi atugarissaartuunerup qaffaaffigineqarnissaanut atorlugit, Qulutannguaq Berthelsen oqarpoq.
Sermersuumi Atassutip taamatut nalunaaruteqarnerminut tunngavilersuutaa, illoqarfiit pingaarnersaata ineriartortinneqarnera unikaallatsinneqassasoq, kommunimi najugaqarfiit allat ineriartornermut malinnaatinniarlugit.
- Ittoqqortoormiit, Tasiilaq, Paamiut nunaqarfiillu ineriartortitsinermut ilanngunneqartariaqarput. Najugaqarfinni inuussutissarsiorneq ineriartortinniarlugut suliffissanillu nutaanik pilersitsiniarluta sulissaagut, taanna oqarpoq.
Inissiat naammaginartumik akillit
Kommuneqarfik Sermersuumi kommunalbestyrelsip illoqarfiit pingaarnersaannut tunngatillugu periusissiamini 2020-mi 30.000-inik innuttaqalernissaq anguniarlugu nalunaarutiginikuuaa. Periusissiaq 2016-imi akuersissutigineqarpoq.
Atugarissaartuunerli inigisanullu akigititat malinnaasinnaanngippata, illoqarfiit pingaarnersaanni inissanik inissianillu pilersitsiniarneq naammanngilaq, Qulutannguaq Berthelsen oqarpoq.
30.000-inik innuttalernissamik pilersaarut tuaviuussamik pilersaarusiaavoq, taanna oqarpoq.
Tassunga taarsiullugut inissiani akilerneqarsinnaasunik sanaartortoqarnissaa Atassummit sulissutigineqarniarpoq, taanna ilisimatitsivoq.
- Inuusuttut ilaqutariillu meerartallit atugarisaat ineqarnikkullu atugaat pitsaanerulersinneqassapput, tusagassiorfinnut nalunaaruteqarnermi ilisimatitsissutigineqarpoq.
Ilanngullugu oqaatigaa meeqqerivinni amerlanerusunik perorsaasoqalissasoq, perorsaasussaaleqinermilli ajornartorsiuteqarnerup qanoq aaqqiiffigineqarsinnaanera oqaatiginagu.
Nuuk City Developmentip sapaatip akunnerani matumai nalunaarutigaa, ingerlatseqatigiiffiit sisamat ilaatigut Qinngutta Siorarsiorfiullu akornanni sullorsualiornissamut neqerooruteqarsinnaasut.