Sermersuarmi ajornartorsiortut ikiorserneqartalissasut

Timmisartoq ajornartoorluni sermersuarmut mittariaqalersimappat issimasut ikiorserneqartalissapput.

Sakkutuut timmisartuata ikiorsiissutissat aaqqissuulluakkat tallimanngorpat Keflavikkimut Kangerlussuarmullu ingerlatissavai, taakku timmisartumi ajornartoorluni Kalaallit Nunaannut mittariaqalersimasumi ilaasunut inuttanullu nakkartinneqartassapput.

Ikiorsiissutissat ilaatigut tassaapput, atallaat annanniutit, GPS, innagavissatut allequttat, alersit issusuut, aaqqatit, sinnguppuui, iganermi atortut, ajunaalernermi ikumatittakkat nerisassallu kiisalu apummik illuikkiornissamut atortut.

Atortussat tamarmik titartagartaqarput oqaatsimik isummamilluunniit takutitsisunik qanorlu atorneqarnissaannut ilitsersuutitaqarlutik, ajornartorsiortut taamaalillutik issittumi annanniarnissamut ilisimaqanngikkaluarlutik taakkunannga atuisinnaassallutik.

Ulluni tallimani annanniarnissamut atorneqarsinnaasut

Poortukkat sermersuarmut nakkarteriaannanngorlugit pallenut katersorneqarsimapput – taakku TEN-packinik taaneqartartut, inunnut qulinut atortussanik imaqarput. Poortukkat issittumi ajornartorsiortut ulluni tallimani imminnut ikiorsinnaatilissavaat.

Ikorsiissutissat Illersornissaqarfimmut ministeeriaqarfimmi Materiel- og Indkøbsstyrselse suleqatigalugu Air Transport Wingsip Flyvestation Aalborgimi ajornartoornermi atortussiorfiani ineriartortinneqarsimapput. Ineriartortitsineq ukiuni arlalinni ingerlanneqarsimavoq, poortukkat sermersuarmi sungiusarnermut atatillugu misilerarneqarsimallutik.

Inuit ajornartorsiortut 350-it ikiorserneqarnissaannut atortussaqarpoq.

Atoriaannanngortut

- Piffissami sivisuumi unammillernartumilu suliniut ingerlatereerlugu atortussat naammassillugit suliarineqarnerat, siunissamilu ajutoortoqassappat inunnik annaassisinnaalerneq suleqataasimasunut tamanut naammagisimaarnarpoq, Peter Bakkestrøm kaptajniusoq Flyvestation Aalborgimilu suliaqarnermut akisussaasuusoq oqarpoq.

Ikiorsiissutissat atoriaannanngorlugit poortorneqassapput, sakkutuullu timmisartuinit qanorluunniit angitigigaluartunit kigaallassaaserlugit nakkartinneqariaannanngussallutik. Danmarkimi sakkutuut timmisartuata C-130 Herculesip atortussat affaat usisinnaavai.

Atortussat Kangerlussuarmi Flyvevåbnets Luftgruppe Vestip najugaqarfigisaani aamma Islandimiittumi Keflavikimi uninngatinneqassapput, Keflavikimi Iceland Coast Guard atortunik uninngatitsiviunissamut ikiuukkusussimavoq. Issittumi Sakkutooqarfik atortunik aqutsisuussaaq, ajornartorsiortoqarnerani timmisartoq qaninnerpaamiittoq atortussanik nakkartitsiartortissallagu.

Ikiorsiissutissat Issittoq pillugu isumaqatigiissummut, Danmarkimi Folketingip 2016-imi akuerisimasaanut ilaapput.

Assitanut oqaasertaliussat:

Credits:

1 aamma 5: ATW

2,3 aamma 4: Ida Birkemose/AK