Sermersuup portunersaartaani Summip Campimi juulimi aatsaat taama kiatsiginera nalunaarsorneqarpoq, kiisalu aamma aasaanerani qaammatit katinnerini aatsaat taama kiatsigisimavoq.

Kalaallit Nunaanni 2023-mi aasaanerani naatsorsuinerit pillugit DMI taama allaaserisaqarpoq.

- Summitimi katinnerani aasaanerani qaammatini pingasuni tamani rekordi annertoorujussuuvoq. Agguaqatigiissillugu kiaassusaa –10,4 °-miippoq, tamannalu rekordimit siulianit 1,0 °C-mik kianneruvoq aamma silaannarmit nalinginnaasumit 3,4 °C-nik qaffasinnerulluni, DMI taama allappoq.

DMI: Kalaallit Nunaanni aasaq kiattoq

Silaannaq nalinginnaasumik taaneqartartoq tassaavoq, piffissap ukiuni 30-ni kingullerni agguaqatigiissillugu silap naatsorsorneqarnera.

Rekordiliineq juulip qaammataata aatsaat taama kiatsigineranik pissuteqarpoq, ilisimatusartut tassani qaammammi agguaqatigiissillugu aatsaat taama kiatsigisumik nalunaarsuipput, tassa 7,3-nik issippoq. Rekordiusimasoq 9,2 gradinik issippoq.

Kalaallit Nunaanni 2023-mi aasaanera kiattorujussuusoq aamma nalinginnaanngitsumik kiassimasoq, DMI inerniliivoq.

Silap pissusaa aalajangersimasoq

Sila pillugu ilisimatusarfimmi DMI-mi sila pillugu ilisimatusartup, Martin Stendelip oqarnera naapertorlugu, Sermersuarmi kiannera silap pissusaanik aalajangersimasunik pissuteqarpoq:

- Atlantikoq Sermersuup portunersaanut ungasikkaluartoq, naqitsinertuffiit aamma naqitsiniisaffiit annertuut USA-mit, Atlantiku qulaallugu Europamut aasap qiteqqunnerani annertuunik rekordiliisitseqattaarput.

- Naqitsinertuffiit aamma naqitsiniisaffiit agguataarneqarnerat, Atlantikumilu immap qaavata aatsaat taama kissartigineranik ilallugu, Kalaallit Nunaata tungaanut silaannarmik kissartumik isugutattumillu ingerlaartitsivoq – Summit Camp tikillugu, Martin Stendel oqarpoq.

Ilisimatusarneq nutaaq nutaamik ataqatigiittoqalerneranik tikkuussivoq

Ilisimatusartup oqarnera naapertorlugu silap pissusiata allanngoriartornerata aamma silap aalajangersimasup akornanni ataqatigiittoqarsinnaavoq.

DMI naapertorlugu Amerikami Avannarlermi aputeqarnerata aamma Kalaallit Nunaanni aasaanerani silap akornanni ataqatigiittoqarsinnaanera, Amerikamiut ilisimatusartut eqimattat ilisimatusarnerisa takutippaat. Ilisimatusaat atuagassiami 'Nature Communications'-imi saqqummersinneqarpoq.

Martin Stendel nassuiaavoq:

- Amerikami Avannarlermi upernaakkut aputeqannginnerunerata Kalaallit Nunaata qulaani naqitsinertuffinnik pilersitsisartoq, ilisimatusarnerup takutippaa, taamaalillunilu silap pissusiata aalajangersimasup allanngoriartorneranut tapertaasinnaasarpoq. Akulikinnerusumik imaluunniit sivisunerusumik aporfeqartitsinerit kiannersuaqartistinernik, kiassutsikkut rekordiliinernik aamma panernersuaqarneranik, kisianni aamma sialussuarneranik takussaanerulersitsisut.