Sermersuaq annikilliartuinnarpoq. Danmarkimi Kalaallit Nunaannilu nunap qanoq issusianik misissuiffik (GEUS), ukiumi aakkiartorfiusumi uuttortaanerit tunuliaqutigalugit taama allappoq.

Annertussusaa namminermini tupigutsannartuunngitsoq, GEUS-imi ilisimatusartuuneq, Robert S. Fausto nassuiaavoq. Sermip ukiorpassuarni tulleriiginnarni annikinnerulernera ajornartorsiutaavoq:

- 200 gigaton annertorpasippoq, kisianni Sermersuup annertussusaata tamakkiisup ilarujussuarinngilaa, ataatsimik pisutut isigalugu aamma ernumanartoqanngilaq.

- Sermersuup ataatsimut annertussusaata ukiuni 27-ni tulleriinni annikillisimanerata nalunaarsorneqarnera ernumanartuuvoq, Robert S. Fausto, GEUS.dk naapertorlugu oqaluttuarpoq.

Ilisimatusartoq Sermersuup nakkutigineqarneranik suliaqarpoq, tassa nakkutilliisoqarfinni PROMICE-mi aamma GC-Net-imi.

Sermersuaq annikilliartortoq

Sermersuup annertusinera 95/96-imi pisimasoq, titartakkami ataani takuneqarsinnaavoq.

Robert S. Faustop Sermersuarmik nakkutiginninneq peqqissaasup nakkutiginninneranut sanilliuppaa:

Grafik: GEUS

- Oqartarpunga peqqissaasuulluta nakorsiartumik misissuisut, tassa Sermersuarmik misissuisut. Maanna ukiorpassuarni tulleriinni misissuereerpugut, ukiunilu 27-ni kingullerni taamatut pisoqarnera takusinnaavarput.

- Annikilliartorpoq, tamannalu uppernarsarsinnaavarput. Maanna nakorsat aamma napparsimaveqarfimmi pisortap katsorsaaneq suliassallu salliuttariaqarpaat, Sermersuaq oqimaaqatigiissaartunngortinniarlugu, Robert S. Fausto.

Annertunngitsumik immap qaffasissusaanik qaffatsitsisoq

Aakkiartornera maannamut nunarsuarmi immamut 1,5 cm-inik qaffatsitsisimasoq nalilerneqarpoq. GEUS naapertorlugu nunat ækvatorip nalaaniittut Sermersuup aanneranit qaffariarneq annertunerpaaq misigissavaat, Nunarsuup ilusaa aamma nusussisimanninnera pissutigalugit imeq tassunga ingerlasussaammat.

Uani ataani titartakkami piffissap ingerlanerani annertuumik annaasaqarnissamut missiliummik takutitsivoq:

Grafik: GEUS