Sermersooq: Suliassanik suliarinninnermi qularnartut arlallit takkussuuttut

Kommuneqarfik Sermersuumi Aningaasaqarnermut Inuussutissarsiornermullu Ataatsimiititap immikkut ittumik ataatsimiinnerani oqaluuserisassani takuneqarsinnaavoq, suliarineqarsimasuni assigiinngitsuni arlalinni kommunalbestyrelsip pisortat suliaqarnissannut malittarisassaliarisimasaanut naapertuutinngittoqartoq.

Kommunimi pisortaq Ole Jakobsen allappoq, naapertuutinngitsut amerlanerit takkussuunnissaat naatsorsuutigineqartoq, pisortaqarfimmit suliarineqarsimasut saqqummiussuunniarlugit iliuuseqartoqarmat.

Suliarineqarsimasut ilaat pineqartoq tassaavoq, kommunimi pisortaasimasup Lar Møller-Sørensenip aamma Sanarfinermut Avatangiisinullu pisortaasimasup Hans Henrik Winther Johannsenip kommunimit politiinut unnerluutigineqarsimanerat.

Suliffeqarfiup pineqartup aqqa saqqummiunneqartoq

Suliassamik saqqummiussissummi suliffeqarfiup Lars Møller-Sørensenip kommuni sinnerlugu isumaqatigiissuteqarfigisimasaata aqqa kommunip allassimavaa, isumaqatigiissutip pineqartup malitsigisaanik politiinut unnerluussisoqarsimavoq.

Suliffeqarfik pineqartoq tassaavoq PJ Management, suliffeqarfiup taassuma isumaqatigiissummik atorunnaarsitsisimaneq pillugu kommunip seks millioner koruuninik taarsissuteqarnissaa piumasarisimavaa, tamanna oqaluuserisassani allassimavoq.

Suliarli taanna kisimi immikkuullarissuunngilaq. Naapertuutinngitsumik suliarineqarsimasut allat tassaapput:

• Nuukullak Manngua 3 aamma 3E pillugit attartornissamik isumaqatigiissut, politikkikkut suliarineqarsimanngitsoq – isumaqatigiissuteqarnermi 1.348.760 kr./ukiumut
• Manguaraq 35 pillugu attartornissamik isumaqatigiissut, politikkikkut suliarineqarsimanngitsoq – isumaqatigiissuteqarnermi 4.081.572 kr./ukiumut
• Iserit A/S-ip taarsigassarsinissaanik isumaqatigiissut, politikkikkut suliarineqarsimanngitsoq – 20 millioner koruunit
• PJ managementimut isumaqatigiissut – 2.780.000 koruunit, immaqalu 6.040.000 koruuninik taarsiissuteqarlunilu tapiliussaqarnissaq
• Sanaartorfigissaanissamik isumaqatigiissut – Mitsimmavimmi suliassanut atatillugu 52 millioner koruunit.

Kingullertut pineqartumi Sanarfinermut Avatangiisinullu Ingerlatsivimmi pisortaasimasoq 2020-mi oktobarip 29-ani Mitsimmavimmi Nuummiittumi sanaartorfigissaanissamut 52 millioner koruuninik qinnuteqarsimavoq.

Qinnuteqaat pineqartoq aggustip qaammataani tunuartinneqarsimavoq, kommunimi ileqqorineqarmat suliniuteqarniaroq taamatut ittumik suliniuteqarnermut atatillugu aningaasartuutissanut tamanut akiliuteqartussaammat, sanaartorfigissaanissaq tassunga ilaavoq, suliamik saqqummiussissumi allassimavoq.