Sermersooq: Siunnersorti ilisimaneqartoq pisortanngussaaq

– Kommuneqarfik Sermersuup aningaasaqarnerata iluarsiivigeqataanissaanut ingerlatsinittalu ingerlatilernissaanut qilanaarpunga, Lars M. Sørensen septembarip aallaqqaataanit Kommueqarfik Sermersuumi Aningaasaqarnermut Sulisoqarnermullu pisortanngornissaminut atatillugu Kommuneqarfik Sermersuup nittartagaanut oqarpoq.
Lars M. Sørensen Kalaallit Nunaanni aningaaqarnermik aqutsinermillu sivisuumik atituumillu misilittagaqarpoq. 1995-imi Mittarfeqarfinni sulisoqarnermut pisortatut atorfinitsinneqearpoq, kingornalu ukiuni 12-ni KNI-mi aningaasaqarnermut pisortaajutigaluni pisortamut tullersortaavoq. Tassani amigartooruterujussuit 205 millioner koruunit sinneqartooruteqalersitseqataaffigai, tusagassiorfinnut nalunaarut malillugu taanna oqarpoq.
– Unammilligassat nuannareqaakka suliassallu ajornakusoortut sapersimagunarnagit. Isumaqarpunga kikkut tamarmik aningaasatigut ajornartorsiutit aaqqissinnaagaat, tamatumunngali piffissaq sivisooq atortariaqarpoq tamaviaarlunilu. Suliami tamatumani sulisut peqataassapput, taamaattumillu pingaaruteqarpoq sulisutta piginnaasaasa ineriartortinnissaat, taanna oqarpoq.
Pisortaaneq Steffen Ulrich-Lynge tusagassiorfinnut nalunaarutikkut allappoq Lars M. Sørensen apriilimiilli kommunimut siunnersortitut attuumassuteqarsimasoq.
– Taamaattumik taanna ilisimalluareerparput. Lars M. Sørensenip takutereerpaa qullersanut minnerunngitsumillu aaqqissuussinitsinnut ikiuutaalluarluni. Suleqatigiilluarnerup pilersereersimasatta nanginnissaa qilanaaraara, Steffen Ulrich-Lynge oqarpoq, taassumalu Lars M. Sørensen nammineq ukiuni 20-ngajanni ilisarisimasimavaa.
Aningaasaqarnermut sulisoqarnermullu pisortaasimasoq Mette Kessel ukioq manna marsimi napparsimasutut nalunaarutigineqarpoq. Taanna 2013-imi juunimi atorfinippoq.