Sermersooq: Siumut isumaqatiginninniarnernit anipput
Siumut aamma Inuit Ataqatigiit Kommuneqarfik Sermersuumi politikkikkut sulinissaminnut imminnut ungasippallaarput. Taamaammat Siumut isumaqatiginninniarnernit peqataajunnaarput.
Siumut Kommuneqarfik Sermersuumi ukiuni sisamani tulliuttuni isumaqatigiissusiornissamut isumaqatiginninniarnermit peqataajunnaarput.
Charlotte Ludvigsen (IA) Sermitsiaq.AG-mut tamaa uppernarsaavoq.
- Siumumik suleqateqarnissaq takorlooruminaatsipparput, politikkikkut immitsinnut ungasippallaaratta, Charlotte Ludvigsen oqarpoq.
Naleraq aamma Demokraatit isumaqatiginninniarnerni suli peqataapput.
Isumaqatiginngissutit arlallit
Sermersuumi isumaqatiginninniarnerit aningaasanut missingersuummut isumaqatigiissummik maanna atuuttumik ingerlatitseqqinnissamik ilaatigut siunertaqarpoq. Isumaqatigiissut Inuit Ataqatigiit, Demokraatit aamma Suleqatigiissitsisut siorna atsiorpaat. Aningaasanut missingersuummi ineqarnerup pitsaanerulernissaa ineriartornerlu qitiutinneqarput.
- Ukiuni sisamani kingullerni siunnerfigut inissititersimavagut, taamaattumillu kommunimut siunniussagut ingerlateqqikkusullugit. Politikkikkut sangujoraannginnissaq angorusupparput, aamma politikkimik suliaqarnitsinni tatiginartuunissarput angorusullugu, taamaattumik suliassat neriorsuutigereersimasagut siunniussagullu ingerlateqqissavagut, Charlotte Ludvigsen IA-p Siumumik isumaqatiginninniarunnaarneranik tunngavilersuilluni oqarpoq.
Siumut nuna tamakkerlugu anguniakkatut suliffeqarfiit Nuummiit illoqarfinnut allanut nussornissaat saqqummiussimavaat. Kommuneqarfik Sermersuumilu Inuit Ataqatigiinnit tamanna isumaqatigineqanngilaq.
Siumut ukiuni sisamani tullerni illuatungiliuttutut inisseqqinnissaminnut piareersartussanngorput.