Sermersooq: Paaqqinnittarfiit upalungaarsimanermut pilersaaruteqanngillat
Kommuneqarfik Sermersuumi paaqqinnittarfiit arlalinnik aaqqitassaqartut naliliinerup, kommunalbestyrelsemi meeqqanut atuarfinnullu ataatsimiititaliamut saqqummiunneqartup takutippaa. Assersuutigalugu paaqqinnittarfiit upalungaarsimanermut tulluarsakkamik pilersaaruteqanngillat.
Anaana ataatalu sulissagaangata Ivalu aamma Malik ullormut akunnerni arfineq-pingasuni paaqqinnittarfimmiittariaqartarput.
Assersuutigaluguli ikuallattoqalissagaluarpat, imaluunniit alla peqqutigalugu meeqqat sulisullu ataatsikkut pinasuartumik anisariaqalissappata, meeqqat sulisullu qanoq iliussappat?
Atuarfeqarnermi ulluuneranilu paaqqinnittarfinnut immikkoortortaqarfimmi perorsaanermut siunnersortit kommunip paaqqinnittarfiini tamani ukiumoortumik nakkutilliisimapput.
Ajunaalernermi aniffissaqanngilaq
Ingerlatsiviup upalungaarsimanermut pilersaarutaata paaqqinnittarfinnut tulluarsarneqarnissaa suliassatut pingaarnertut inissinneqarpoq.
- Paaqqinnittarfiit tulluarsarsimasumik upalugaarsimanermut pilersaaruteqanngillat. Ingerlatsiviup piumasaraa paaqqinnittarfiit kingusinnerpaamik marts 2019 tulluarsaallutik upalungaarsimanermut pilersaarusiussasut, taannalu 2019-ip ingerlanerani naammassineqariissasoq, suliamik saqqummiinermi, Kommuneqarfik Sermersuup meeqqanut atuarfinnullu ataatsimiititaliaannut saqqummiunneqartumi allassimavoq.
Kommunimi paaqqinnittarfiit marluk, ”Ajaaja aamma Paarsisoq sinittarfimmi aaqqitassat piaartumik aaqqinneqarnissaannut inanneqarput”. Paaqqinnittarfinni taakkunani isaariaq ataasiinnaavoq, ajunaalernermilu, soorlu ikuallattoornermi, allamik aniffissaqarani.
- Ajaajami ajunaalernermi aniffissaq siniffinnik assersorneqarsimavoq, allassimavoq.
Angajoqqaanut attaveqarneq
Nakkutilliisut nalilerpaat angajoqqaat paaqqinnittarfiillu suleqatigiinnerat pitsaasuusoq, attaveqarnerli amigarsinnaasarluni. Attaveqarnermi attaveqarfissat assigiinngitsut atorneqartarput, paasissutissallu ilaat annaaneqartoorsinnaasarlutik.
- Attaveqarfiit ataatsimoorluni attaveqarfiusinnaasut amigaatigineqartillugit angajoqqaat naammaginnikkunnaartarput.
Paaqqinnittarfinni pisortat ilisimatinneqarput attaveqariaaseq angajoqqaanit tamanit atorneqarsinnaasoq atorneqassasoq.
Sulisut allanngorarnerat
Ataatsimut isigalugu sulisut aalajaapput, sulisulli taarseraannerat ilaatigut ulluinnarsiutaasinnaasarpoq – paaqqinnittarfiit ilaanni akulikippallaarsinnaalluni.
Paaqqinnittarfiit ilaanni meeqqat paarineqartut ukiumut quleriarlutik paarsisussaminnik nutaamik naapitsisarput.
- Paaqqinnittarfinni amerlanerpaani sulisut ataatsimiit pingasut tungaannut ukiumut soraartarput, sumiiffiilli ilaanni sulisut qulit ukiumi ataatsimi allamut suliffissarsiorsinnaasarlutik, allassimavoq
Isumatusaarneq atorneqartarpoq
Meeraaqqeriviit meeqqeriviillu perorsaanermi tunngaviit arfineq-marluk atulernikuuaat. Sulisulli tunngavinnut arfineq-marlunnut ilisimasaqarnerat killeqarpoq, ilinniartitaanermut aqutsisoqarfimmit ilinniartitsinissaq amigaataammat.
- Perorsaanermi tunngaviit arfineq-marluk tamakkiisumik atulersinneqarnissaat suli naammassinngilaq. Sulineq kigaappoq, sulisullu amerlasuutigut isumatusaarnertik atortariaqartarpaat.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...