Sermersooq: Nuup Kangerluani arferit eqqissiimatitaalerlik
Michael Rosingip Suleatigissitsisuneersup siunnersuutigaa, qipoqqaat Nuup Kangerluaniittut piniaqqusaajunnaarnissaat. Siunnersuut maanna kommunimit Namminersorlutik Oqartussanut nassiunneqarsimavoq, tamanut tusarniaassutigineqannginnerani isummertinniarlugit.
Arferit ukiumut pisarineqartartut ikittunnguungaluarput, Nuulli Kangerluani qipoqqarniartarnerup inerteqqutaalernissaa pineqartillugu isummat assigiinngissinnaapput.
Kommuneqarfik Sermersuumit nalunaaruisaq juunip arfineq-aappaanni Naalakkersuisunut nassiunneqarpoq, kissaatigineqarluni arferit Nuup eqqaaniittut eqqissisimatinneqarnissaasa akuerineqarnissaa.
Kommuneqarfik Sermersuumi komunalbestyrelsimi ilaasortaq Michael Rosing (SAM), Charlotte Ludvigsenip Asii Chemnitz Narup taarserlugu siorna juunip qaammataani borgmesterinngortumut tapersiissaguni ataasiinnarmik piumasaqaateqarsimavoq. Qpqqaat Nuup Kangerluaniittut eqqissisimatinneqassasut.
Takornarianut nalilipilussuusut
- Qipoqqaat takornariartitsisartunut nalilipilussuupput. Pingaartumik umiarsuarnut ilaallutik takornariartartut arfernik takusaqarusuttarput, suliffeqarfiillu Nuummi ilaasunik angallassisartut tamangajalluinnarmik tamatumannga suliaqartarput, Michael Rosing Sermitsiaq.AG-mut oqarpoq.
Maannalu suliamut tassunga atatillugu pisoqalerpoq. Siunnersuut tamanut tusarniaassutigitinnasut inaarutaasumillu akuerineqartinnagu Naalakkersuisunut isummerfigisasanngorlugu nassiuneqarsimavoq.
Michael Rosingip nalilerpaa, piniartup arfermut ataatsimut tunngatillugu pissarsissutigisartagaatut annertutigisumik, takornariartitsisartut ullormi ataasiinnarmi takuniaatitsigaangamik isertitaqartartut. Assigiinngissutaasorli tassaavoq, arferup uumasup ukiorpassuarni aningaasanik isaatitsissutaasinnaanera.
Siunnersuut taamatut ittoq aatsaat siullermeerluni saqqummiuneqalinngilaq. 2010-mi ukiut 20-t qipoqqarniartoqaqqusaanngereersoq piniarsinnaaneq ammaanneqarmat, Pinngortitaleriffimmi ilisimatuup Lars Wittingip oqaatigisimavaa, arferit nerisassatut sassaalliutigineqartarnerannut sanilliullugu, kangerlummi ingerlaartarnerat naleqarnerusoq.
Qanorsuaq nerisinnaavusi, taamaallaat maaniunngitsoq
Michael Rosingip erseqqissaatigaa, piniarneqartarnissaannik killilersuiniartoqanngitsoq.
- Qipoqqaat mamarluartuusut qularnanngilaq. Pisarineqartarnerat ajorinngilara. Kangerlummi pisarineqanngikkunik ajunngilaq, taanna oqarpoq.
Qiporartassiissutit Kitaani tamarmi katillutik quliupput, taakkulu aqutsiveqarfinnut agguataarneqarsimanngillat. Siorna qipoqqaat Kitaani pisarineqartut katillutik pingasuusimapput.
Nalunaarutissatut siunnersuummi anguniagaavoq, malittarisassanik unioqqutitsisoqarsimatillugu akiligassiisoqartarnissa Nunatta Karsianut nakkartinneqartartussanik, neqimillu arsaarinnittoqartarnissaa.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...