Sermersooq: Namminersorlutik Oqartussat peqqussutaat inatsimmut naapertuutinngilaq

Namminersorlutik Oqartussat Kommuneqarfik Sermersuumut peqqussutigisimavaat, illoqarfiit pingaarnersaanni inissanik pissarsiniarnermi periutsimik aalajangersimasumik kommuni atueqqissanngitsoq.

Kommuni isumaqarpoq peqqussut inatsimmut naapertuutinngitsoq, kommunillu eqqartuussissuserisoqarfiit marluk suliamik misissuitissimavai.

- Kommuneqarfik Sermersooq peqqussummut apeqqusiisimavoq, taamaammallu peqqusisoqarmalli inissat nutaat pillugit aalajangiissuteqarsimanani. Eqqartuussissuserisulli marluk imminnut attuumassuteqanngitsut maanna uppernarsarsimavaat, peqqussut inatsimmut unioqqutitsinerusoq, kommuni Sermitsiaq.AG-mut allakkatigut oqaaseqarluni ilisimatitsivoq.

Inissaqartitsiniarnikkut aaqqissuussaq misissuiffigineqartoq

Matumani pineqarpoq, Namminersorlutik Oqartussani Nunamut Namminermut Immikkoortoqarfiup Kommuneqarfik Sermersuumi nakkutilliilluni misissuinera. Immikkoortortaqarfik kommuninik nakkutilliisuuvoq, kommunillu inissiat 300-t missaanniittut sanasunit namminersortunit attartormagit, kommunip inatsisinik unioqqutitsisimanersoq misissuiffigilersimallugu.

Kommunip inissiaatileqatigiiffiutini– Iserit - aqqutigalugu inssiat innuttaasunut attartorteqqittarsimavai, kommuni naapertorlugu Nuummi inissaaleqisut amerliartuinnarnerat aaqqiifiginiarlugu.

Nunamut Namminermut Immikkoortortaqarfiup februaarip qaammataani nakkutilliinermut atatillugu peqqussutigisimavaa, inissanik pissarsiniarluni aaqqissuussamik atueqqissanngitsoq.

Kommunilli eqqartuussissuserisoqarfiit marluk Nuna Advokater aamma Eqqartuussissuserit Malling & Hansen qinnuigisimavai peqqussummik nalileeqqullugit, eqqartuussissuserisullu taakku marluullutik peqqussut inatsimmut naapertuutinngitsoq inerniliullugu oqaatigisimavaat.

- Namminersorlutik Oqartussani Naalakkersuisut Siulittaasuata Naalakkersuisoqarfiata 2020-mi februaarip aqqaneq-aappaanni allakkatigut peqqussutaa inatsimmimmik tunngaveqarani peqqussutigineqarsimavoq, taamalu inatsisitigut pituttuisuunani, Nuna Advokater allakkiamini inerniliivoqt.

Eqqartuussissuserisut tamaasa ataatsimut isigaluti oqaatigaat, Nakkutilliisoqarfik kisimi kommuninut peqqussuteqarsinnaasoq, tassa Namminersorlutik Oqartussat peqqussuteqarsinnaanngitsut. Nakkutilliisoqafimmut tunngassuteqartut pillugit ilanngutassiap matuma naggataani paasisaqarnerusinnaavutit.

Borgmesteri naammaginninngitsoq

Borgmesterip Charlotte Ludvigsenip (IA) Namminersorlutik Oqartussat suliamut atatillugu iliuusaat naammaginngilluinnarpai, oqaatigalugu ”quianaannarporluunniit”:

- Quianaannarporluunniit. Oqartussanit aqunniarsaraluta nammineq inatsimmik unioqqutitsisumit, inatsimmik unioqqutitsinerarluta pasillerneqarnerput. Naatsorsuutigiuaannarpara, pisortatut oqartussat inatsimmik mailinninnissaat, pingaartumik oqartussat allat inatsimmik malinninnersut pillugu nakkutilliisussat, Charlotte Ludvigsen oqarpoq.

- Sooq kommuni, nakkutilliisut kommunip inissanik pissarsiniarluni inatsit atuuttoq naapertorlugu iliuuseqarsimanersoq pillugu misissuisussaq, akerlilerniarlugu aningaasarpassuarnik atuiva?

- Misissuiffigineqarnerput ajoriffissaqartinngilara, Namminersorlutilli Oqartussat peqqussuteqarsimapput paragraffmik unioqqutissimasatsinnik ataatsimilluunniit taasaqaratik, inatsimmillu tunngavissaqaratik. Taamatut suleriaaseqartoqarnera ernumanartittupilussuuara, Charlottq Ludvigsen oqarpoq.

Kommunip Naalakkersuisut peqqussummik tunuartitseqqullugit maanna saaffiginiarpai.

Namminersorlutik Oqartussani Nunamut Namminermut Immikkoortortaqarfiup Sermitsiaq.AG-mut ilisimatitsissutigaa, Kommuneqarfik Sermersuup isornartorsiutaanik nalililiinissamut suli periarfissaqaralersimanatik.

Kommuninut Nakkutilliisoqarfik pillugu paasissutissat:

Nunamut Namminermut Immikkoortortaqarfik Kommuninut Nakkutilliisoqarfimmut allattoqarfiuvoq.

Nakkutilliisoqarfiup nakkutigisarpai, kommunalbestyrelsit ingerlatsinerminni Kommunit aqutsinerat pillugu Inatsisartut inatsisaanni (Aqutsinermut inatsit) malittarisassat malinneraat kiisalu pisortat inatsisaanni malittarisassat atuuttut malillugit ingerlatsinersut.

Allattoqarfittut Nunamut Namminermut Immikkoortortaqarfiup Nakkutilliisoqarfiup suliassai oqallisigineqarnissaanut piareersartarpai, kiisalu suliani oqaaseqaatit pisariaqartut pissarsiarisarlugit aamma piviusut erseqqissarneqarnissaat ujartortarlugit. Tamatuma kingornagut Nunamut Namminermut Immikkoortortaqarfik suliani ataasiakkaani Nakkutilliisoqarfiup ataatsimiinnerinut nassuiaatinik suliaqartarpoq, suliami piviusumik naalisaanertalinnik kiisalu suliassaqarfimmilu pineqartumi aalajangersakkanik atuuttunik nalunaarutitalinnik.

Naalakkersuisut Nakkutilliisoqarfimmut suliamik saqqummiussisinnaapput, piffissap killiliussap aalajangikkap iluani kommuni pissutsit, nakkutilliinermut atatillugu Naalakkersuisut itisileqqusaat pillugit uppernarsaatinik nassiussinngippat.

Aqutsinermut inatsimmi § 49 naapertorlugu Naalakkersuisut aalajangersinnaavaat, suliamik Nakkutilliisoqarfimmut saqqummiussinissamut naammaginartumik toqqammavissaqarnersoq. Aalajangersakkamut tassunga nassuiaatini taaneqarpoq, Naalakkersuisut, kisimik aalajangersinnaagaat, suliaq ima pissuseqarnersoq, suliaq Nakkutilliisoqarfimmut saqqummiuttariaqarluni kinguneqartinnissaanut isumaliutigineqarluni. Taamaasillutik allat Nakkutilliisoqarfimmut suliamik saqqummiussisinnanngillat.

Kommuninut Nakkutilliisoqarfimmi ilaasortaapput:

Siulittaasoq Sólja í Ólavstovu, Savalimmiuni Ombudsmandi (Kalaallit Nunaanni Eqqartuussisuunermit toqqarneqartoq)

Ole Dorph (24. april 2018-imi Inatsisartunut qinersinerup kingorna Inatsisartunit toqqarneqartoq)

Agathe Fontain (24. april 2018-imi Inatsisartunut qinersinerup kingorna Inatsisartunit toqqarneqartoq)

Emilie Olsen (Kommuninit ataatsimoortunit toqqarneqartoq)

Hans Aronsen (Kommuninit ataatsimoortunit toqqarneqartoq)

Pissarsiffik: Naalakkersuisut.gl