Sermersooq: Naleraq kommunalbestyrelsimi allamik ilaasortaatitaqalersoq
Kommuneqarfik Sermersuup kommunalbestyrelsiani Naleqqap ilaasortaatitaata aappaata Emanuel Nûkop Inatsisartuni suliaqarnini ukkatariniarlugu kommunalbestyrelsimit sulinngiffeqalerpoq. Finn Karlsen taanna taarserlugu ilaasortanngortinneqarpoq.
Kommuneqarfik Sermersuumi ineqarnermut atatillugu suliap oqallissigineqarnerani Naleqqap kommunalbestyrelsimi ilaasortaatitaata appaa taarserneqarpoq.
Tassalu Emanuel Nûko Tasiilameersoq, taanna apriilip qaammataani qinersisoqareersoq Inatsisartuni kommunalbestyrelsimilu ilaasortanngorpoq. Taakkununngali marlunnut ilaasortaaneq oqimaappallaarsimavoq.
Emanuel Nûko Tasiilameersoq qinersisoqareermat aalajangersimavoq, nuna tamakkerlugu politikkimi suliaqarnissaq salliutinniarlugu Kommuneqarfik Sermersuup kommunalbestyrelsianit sulinngiffeqarnissamik qinnuteqarniarluni. Taakkunanimi marluusuni suliaqarnissap oqimaappallaarnissaa ernummatigisimavaa. Taamaammat isumannani allanngortissimmallugu.
- Naleraq Inatsisartuni sullinniarpara, aammali kommunalbestyrelsimi ilaasortaaniarpunga. Taamaaliorniarpunga qinersisikka ataqqillugit aamma Tasiilami Naleqqap siulersuisuisa kammattuinerisigut, qinersisoqarnerata kingorna Emanuel Nûko Sermitsiaq.AG-mut oqarsimavoq.
Inatsisartuni suliaqarnissaq salliutinniaraa
Qinersereertoqarneranili Naleqqami politikkerip suliassat annertuallaarnissaat ilisimareersimavaa.
- Misilittakkakka malillugit nalunngilara, Inatsisartuni ilaasortaalluni piareersarluarsimasariaqartoq. Inuiaqatigiillu sullinniarlugit qinigaaffinni marluusuni suinissamut piareersimavunga, taanna oqarpoq.
Emanuel Nûkolli maanna Inatsisartuni suliaqarnissaq salliutinniarpaa, taamaammallu kommunalbestyrelsimi ilaasortatut qinigaaffimminit sulinngiffeqarnissaq novembarip 22-ani qinnutigisimallugu. Tamatuma malitsigisaanik Naleqqap siullertut sinniisussaa Finn Karlsen Kommuneqarfik Sermersuumi kommunalbestyrelsimi ilaasortatut ivertinneqarpoq.