Sermersooq: Innuttaasunik kiffartuussivimmi sullinneqarnissamut piffissamik inniminniisoqartassaaq
Kommuneqarfik Sermersuumit piumasarineqarpoq, nunami tuniluuttoqarnerulernera pissutigalugu Innuttaasunik Kiffartuussivimmi sullinneqarnissamut mailikkut oqarasuaatitigulluunniit inniminniisoqartassasoq.
- Tamanna coronavirusimik tunillaassuisinnaanermik pinaveersaartitsinissamik tunngaveqarpoq. Pinaveersaartitsineq massakkorpiaq atuuttussanngortinneqarpoq, illoqarfiit pingaarnersaata kommunia nittartakkamigut ilisimatitsivoq.
Ilisimatitsissutigineqarpoq, Innuttaasunik Kiffartuussivimmi sullissinermut ataatsimut minutsit 20-t atugassatut naatsorsuutigineqartartut.
Kommunip nittartagaani takusinnaavat, kommunip illoqarfiini assigiinngitsuni sullinneqarnissannut qanoq inniminniisinnaanerlutit.